Невладината организација „Македонска платформа против сиромаштијата“, по шести пат ќе ја организира националната конференција на сиромашни и социјално исклучени лица во петок на 15 септември, со почеток во 10 часот, во Домот на хуманитарни организации „Даре Џамбаз .
Конференцијата „Работа, колку да не е без ич …” е посветена на вработените, а сиромашни граѓани. Фокусот на дискусијата ќе биде да се надмине и прошири традиционално прифатениот концепт дека сиромашни се само оние кои немаат работа и оние кои имаат ниски плати.
Тема за дискусија ќе биде и „сивата економија“, несигурните вработувања на краток рок и лицата кои се единствени вработени во своите семејства. Исто така, ќе се зборува за работничките права, безбедноста и сигурноста на работните места.
Конференцијата е начин да се слушне гласот на лицата кои живеат во сиромаштија или се социјално исклучени, а ќе имаат можност своите проблеми и потреби и лично да ги презентират пред Владини и невладини преставници. Според организаторите, преку ваквиот начин на работа се промовира активно учество и вклучување на овие лица во демократска дебата која треба да даде решенија за поквалитетен живот на сите граѓани.