Шуто Оризари доби нова енергетски ефикасна градинка во која ќе бидат згрижени околу 200 деца. Градинката е изградена на местото каде пред четири години изгоре поранешната градинка.
Изградбата траеше две ипол години, а финансиски беше помогната од Министерството за труд и социјална политика и Кралството Норвешка, со поддршка од УНДП.
Градинката, која е во фаза на официјално отпочнување со работа, денеска ја посетија министерката за труд и социјална политика Мила Царовска, градоначалникот на Шуто Оризари, Курто Дудуш, првиот секретар на Норвешката амбасада во Белград, Геир Хакон Јохансен и постојаната претставничка на УНДП, Нарине Сахакијан.
– Очекувам оваа градинка да продолжи да функционира со истиот квалитет и и да инвестира во децата. Како Министерство интензивно градиме инфраструктура која треба да создаде капацитет за сместување на што повеќе деца од предучилишна возраст, изјави Царовска по посетата на градинката.
Нагласи дека како Влада внимаваат на рамномерниот регионален развој и поеднакво вложуваат и во градските и во руралните средини.
– За првпат оваа Влада објави мапа на опфат на деца од предучилишно образование која е јавно достапна на нашата веб страница. На мапата е јасно видливо дека во западниот дел од државата има помалку инфраструктура за предучилишно образпвание. Тоа укажува дека претходната влада воопшто не вложувала во развој на предучилишното образование таму. Но, треба да кажеме дека и во Врапчиште, и во Тетото, и во Теарце се подготвени проекти кои се финализираат и треба да се почне да со градба. Сигурна сум дека ќе успееме да го изедначиме пристапот на сите деца во државата до предучилишно образование, рече Царовска.
Според постојаната претставничка на УНДП, Нарине Сахакијан, Северна Македонија е една од државите во Западен Балкан која води грижа за ромското население.
– Ја поздравуваме одлуката на Владата да обезбеди средина во која сите подеднакво ќе ги уживаат правата, рече Сахакијан.
Покрај занимални и кујна, дворот на градинката е опремен со реквизити наменети за најмалите.
Извор: МИА
