Европската Унија денеска изрази поддршка на Меѓународниот кривичен суд (МКС), по вчерашната одлука на САД за воведување санкции кон четворица негови судии.
Претседателката на Европската комисија порача дека ЕК целосно ги поддржува Меѓународниот кривичен суд и неговите службеници.
– МКС ги повикува на одговорност сторителите на најтешките злосторства во светот и овозможува да се чуе гласот на жртвите. Тој мора да биде слободен да дејствува без притисок. Ние секогаш ќе се залагаме за глобална правда и почитување на меѓународното право, наведе Фон дер Лајен во објава на Икс.
Високата претставничка на ЕУ за надворешни работи и безбедносна политика Каја Калас, исто така во објава на Икс, му изрази поддршка на работата и независноста на Судот.
– Меѓународниот кривичен суд ја поддржува правдата за најтешките злосторства. Тој кора да остане ослободен од притисок и верен на своите принципи. Ние секогаш ќе ја поддржуваме неговата витална работа и ќе ја штитиме неговата независност, наведе Калас.
Портпаролката на Еврокомисијата за надворешни работи и безбедносна политика Анита Хипер истакна дека ЕУ има јасен став дека Судот е камен темелник на меѓународната правда и борбата против неказнивоста.
– Длабоко жалиме поради одлуката за воведување санкции и ќе обезбедиме целосна поддршка и придонес за да се гарантира заштитата на Судот, рече Хипер.
Таа додаде дека ЕК ќе продолжи да го поддржуваме МКС и принципите утврден во Римскиот статут за неговото основање.
– Остануваме посветени да работиме заедно со сите држави потписнички и другите партнери од целиот свет за да го поддржиме Судот и да ја зачуваме и почитуваме независноста на судиите и интегритетот на Римскиот статут, додаде Хипер.
Американската администрација воведе санкции против четворица судии на Меѓународниот кривичен суд, како одговор на истрагите за можни воени злосторства извршени од страна на припадници на вооружените сили на САД во Авганистан и поради налозите за апсење на израелскиот премиер Бенјамин Нетанјаху.
Американскиот државен секретар Марко Рубио најави дека санкциите се однесуваат на судиите Соломи Балунги Боса од Уганда, Лус дел Кармен Ибанес Каранса од Перу, Рејне Аделаида Софи Алапини Гансу од Бенин и Бети Холер од Словенија.
– Овие четири лица, како судии на МКС, активно учествуваа во нелегални и неосновани постапки против САД и нашиот сојузник Израел. МКС е политизиран и лажно тврди дека има неограничена надлежност да истражува, обвинува и гони граѓани на САД и на сојузничките земји, рече Рубио.
Меѓународниот кривичен суд возврати дека санкциите претставуваат обид за поткопување на неговата независност.
– МКС целосно стои зад својот персонал и ќе продолжи со својата работа, се наведува во реакцијата на Судот.
