В.д. директорот на Центарот за управување со кризи (ЦУК) Стојанче Ангелов денеска информираше дека во секој момент се очекува од Србија да пристигнат четири хеликоптери на скопскиот аеродром, кои ќе бидат употребени за гаснење на пожарите во попладневните часови. Исто така, потврден одговор за помош при гаснење на пожарите има и од Словенија и Грција.
Од Србија се очекува во секој момент да стигнат четири хеликоптери на скопскиот аеродром, кои бидат употребени за гаснење во попладневните часови. „Ние не можеме отсега да планираме каде ќе ги употребиме. Треба да видиме што ќе се случи во наредните два, три часа, бидејќи пожарите се непредвидливи“, објасни Ангелов на денешната прес-конференција.
Тој посочи дека неколку силни пожари се веќе ставени под контрола, а неколку се локализирани. Но, бројот на пилотите е ограничен.
„Во текот на вчерашниот ден на рапсолагање беше само еден хеликоптер. Во текот на ноќта вториот беше сервисиран на лице место. Вработените се изложуваат на надчовечки напори да го оспособат и вториот хеликоптер за да може безбедно да лета“, информираше Ангелов.
Денеска во раните утрински часови, полетале два хеликоптера кои што го гаснеле пожарот во Кочани. Ангелов појасни дека кога температурата се качува, и кога доаѓа до замор, мора да се прави пауза, а со падот на температурите, повторно ќе се интервенира.
„Иако некои пожари навидум изгледаа наивни, тие брзо се раширија. Доволно е едно мало пламенче за пожарот да се рашири. Од друга страна, пожар не се гасне само со хеликоптери. Исто како во војна, додека пешадија не нагазне, додека човечка нога не стапне, ние не можеме да го третираме пожарот изгаснат. Ветрот го шири пламен со ненормална брзина“, истакна Ангелов, додавајќи дека денеска се мобилизирани сите противпожарни сили во критичните зони. Ангажирани се многу припадници на локалната самоуправа, но и граѓани доброволци.
Ангелов ја посочи и големата бројка на пожари, којаа ги отежнуваше интервенциите. „Вчера во текот на денот во Штип имаше три локални пожари во градот. Во Скопје имаше околу 15 урбани пожари, така што ние не можеме сите екипи од Скопје да ги упатиме да гаснат шумски пожари“, објасни в.д дикреторот на ЦУК.
Воедно, како што рече, припадниците на ДЗС се комплет на терен, и има вкупно 200 припадника на Армијата кои се на терен.
„Во овој момент, бидејќи се работи за тешко пристапни терени, ние да однесеме и илјада луѓе тие нема таму како да се качат. Од друга страна, гаснење на вакви моќни пожари ги изложува луѓето на ризик. Дали треба да дозволиме некој пожарникар или некој војник да ни загине? Но, секако преземени се сите можни мерки“, изјави Ангелов./ МИА
