Бугарите поделени околу еврото по одобрувањето за приклучување кон валутата

Бугарија се приклучи на Европската Унија во 2007 година. Таа ќе стане 21-ва земја што ќе го усвои еврото на 1 јануари 2026 година. Промената ќе ги олесни трговските текови и ќе ѝ даде место во Управниот совет на Европската централна банка за одредување на стапките.

И покрај очекуваните придобивки, сепак, многумина во Бугарија се скептични. Распространетата корупција, силната нееднаквост во приходите и четиригодишната политичка криза, обележана со серија предвремени избори и слаби коалиции, ја еродираа довербата во властите. Многумина се плашат од пораст на цените за време на преминот, како што се случи во другите земји што се приклучија во текот на изминатата деценија, пишува Ројтерс.

Анкета на Евробарометар објавена минатиот месец од страна на Европската комисија покажа дека 50% од Бугарите не ја поддржуваат заедничката валута, во споредба со 46% во ноември.
„Кога не им верувате на институциите во земјата, многу е потешко да се направи каква било транзиција… особено кога станува збор за приклучување кон еврото“, изјави за Ројтерс Петар Ганев, виш истражувач во бугарскиот Институт за пазарна економија.
Владата, чии министерства ја поздравија најавата како заслужен исход по десетгодишен напор, во среда изјави дека ќе работи на спречување на практики што можат да ја компромитираат довербата во преминот.

„Важно е да се обезбеди постојан мониторинг поврзан со цените, за да можат бугарските граѓани и бизниси да бидат сигурни дека нема да бидат дозволени неоправдани зголемувања на цените во овој период“, изјави министерката за финансии Теменушка Петкова на прес-конференција.

Гувернерот на централната банка, Димитар Радев, изјави дека техничката и логистичката инфраструктура што веќе е изградена треба да се доведе во режим на „еврозона“, а банката ќе ѝ помогне на владата во спроведувањето информативна кампања за еврото.

Секојадневната стока во продавниците веќе е наведена во евра, како и во бугарската валута левов, за луѓето да се навикнат на конверзијата. Сепак, останува гласното политичко противење. Илјадници луѓе присуствуваа на протестот организиран од крајнодесничарската Партија за преродба пред парламентот во главниот град Софија во среда, на кој демонстрантите мавтаа со бугарски знамиња и скандираа „не на евроколонијализмот“, пишува во статијата на Ројтерс.

Со просечна месечна плата од 2.443 лева (1.420,76 американски долари), Бугарија е најсиромашната земја во Европската Унија. Населението во руралните области надвор од Софија ќе биде најранливо на инфлација.

Д. Т.