Се трудевме политичкиот дијалог, вкрстувањето на аргументите и битката за менување и подобрување на законските одредби за олеснување на животот на нашите граѓани да се одвива тука, во Собранието, во рамки на домот на демократијата и тоа можеше да се види преку телевизискиот собраниски канал и со следење на седниците преку стримување. Не велам дека ова е максималното што можевме да направиме, напротив, секогаш може повеќе, меѓутоа ве уверувам дека нашите уставни и деловнички обврски ќе продолжат и понатаму да бидат основната рамка во која ќе се движи Собранието на Република Северна Македонија.
Ова денеска го соопшти претседателот на Собранието Талат Џафери во својата завршна годишна изјава. Тој посочи дека и оваа година Собранието и пратениците работеле следејќи ги протоколите за заштита од КОВИД -19. Потсети дека пленарните седници се одржуваа во Големата сала на Собранието, попозната како Купола.
– Поради протоколите беа прекинати и организираните посети на граѓаните во Собранието и се одвиваа на виртуелен начин. Оваа година имавме и редовни локални избори кои наметнуваат одредени ограничување врз основа на Деловникот за работа на Собранието, за работа во време на изборни активности така што во тој период не одржувавме пленарни и комисиски седници, изјави Џафери.
По изборите и по најавената оставка на претседателот на Владата, како што рече, настана период на неизвесен политички живот во земјава, кој, пак, предизвика делумна или техничка функционалност на домашните институции меѓу кои и Собранието.
– Сепак, и во ваквите ограничувачки услови, законодавниот дом ја потврди својата ефективност и продуктивност во дадениве услови. Од вкупно 59 пленарни седници, 39 се завршени. Незавршени пленарни седници се вкупно 20, информира Џафери.
Претседателот на Собранието соопшти дека во 2021 година се донесени вкупно 209 закони, од кои по редовна постапка се донесени 111, а по скратена постапка се донесени 79. Вкупно 188 закони се поднесени од Владата, 21 се поднесени од пратеници во Собранието, донесени се и 21 закон за ратификација на договори помеѓу Република Северна Македонија и други земји.
Џафери информира дека преостанати, незавршени точки што треба да се разгледаат на седници на матичните комисии за понатамошно процесирање на пленарна седница по матични тела се следни: Комисија за земјоделство, шумарство и водостопанство – седум точки, Комисија за европски прашања – 12 точки, Комисија за политички систем и односи меѓу заедниците – 10 точки, Комисија за одбрана и безбедност – една точка, Комисија за здравство – две точки, Комисија за финансирање и буџет – шест точки, Комисија за образование, наука и спорт – пет точки, Комисија за економски прашања – четири точки и Комисија за транспорт, врски и екологија – девет точки.
Претседателот на Собранието Талат Џафери изјави дека утре е Денот Д кога ќе се даде мандатот на новиот мандатар, претседателот на СДСМ, Димитар Ковачевски. Образложувајќи ја целата постапка за избор на нова влада, Џафери смета дека таа би ја преземала функцијата на 17 јануари 2022 година.
– Според првичните информации, утре би требало да биде Денот Д за давање мандат на новиот мандатар, кој веќе е определен, тоа е претседателот на СДСМ. Од тој момент со давање на мандатот претседателот на државата според член 210 од Деловникот треба да го извести претседателот на Собранието за давање на мандатот за да почнат роковите во Собранието, да се пребројат, да се бројат роковите. Значи и за нас, а и за мандаторот. Мандатарот во рок од 20 дена од приемот на мандатот, значи не подоцна од 20-тиот ден од приемот на мандатот, треба да излезе пред Собранието со предлог персонален состав на новата влада и програма за работа на владата, изјави Џафери, одговарајќи на новинарско прашање за очекувањата кога би се случило избор на нова влада.
Џафери изрази надеж дека мандаторот нема да оди во крајните рокови, имајќи ги предвид, како што рече, сите преговарања што се направени претходно и сите оние најави по однос на евентуални поединечни персонални решенија коишто провејуваа во јавноста.
– Во секој случај, варијантите за организација на работата на Собранието се предвидени, и ако е тоа крјаниот рок 20-тиот ден, а и ако е пократок рокот. Но, во секој случај, во моментот кога ќе се добие персоналниот состав и програмата на владата, тогаш почнува рокот на Собранието, во рок од 15 дена од тој момент да се свика седница за избор на влада. Седницата трае два дена. Вториот ден, пред 24 часот треба да се гласа за нова влада и очекувам некаде 10-11 да добијам предлог состав на владата и програма и врз основа на консултации со пратеничките групи кои се во Собранието, да се определи датум за одржување седницата. Најверојанто тоа ќе биде 15-16 јануари, односно ако се добие предлогот на 10-11, 15-16 да се одржи дебата два дена, вториот ден на 16, пред 24 часот да се изгласа новата влада, која на 17 изутрината би ги презела функциите во министерствата, односно во владата како тим со мандати и со сите овластувања коишто произлегуваат од одлуката со избор, појасни Џафери.
Прашан што ако нема мнозинство, Џафери рече дека има мнозинство и додаде оти тоа сите го знаат.
– Има 64 пратеници како мнозинство и тоа фактички ќе го покаже гласањето, додаде Џафери.
Извор: МИА
