ДУИ: Мицкоски како Милошевиќ одредува кој е „прифатлив“ Албанец, а кој не

Премиерот Мицкоски, во своето последно јавно обраќање, повторно се впушти во опасната реторика на поделба и дискриминација, овојпат насочена кон Албанците. Во моменти кога губи поддршка дури и од своите најблиски сојузници, тој повторно се обидува да го одредува кој е „прифатлив“ Албанец, а кој не – пракса што историски потсетува на најмрачните денови од деведесеттите кога оваа политика беше промовирана од Милошевиќ, велат од ДУИ.

„Наместо да се фокусира на реформите што ги вети, на приближување кон ЕУ, економска стабилност и почитување на етничката рамнотежа, Мицкоски продолжува со националистичка агенда која има за цел да создаде подредени Албанци – послушни, неми и декоративни. Ова е јасен обид да се врати времето кога други одлучуваа во име на Албанците, а тие беа третирани како статистички број, а не како рамноправни граѓани“, велат од партијата од Мала Речица.

ДУИ јавно предупредува дека ваквата реторика не само што е опасна, туку и веќе произведува обратен ефект: таа ги обединува Албанците, ги сплотува дури и најголемите политички опоненти околу една заедничка цел – одбрана на достоинството, политичката автономија и иднината на албанската заедница во државата.

„Остатоците од Влен, кои сè уште опстојуваат на функциите благодарение на Мицкоски, треба да се прашаат дали сакаат да бидат соучесници во една политика на поделба и омаловажување. Наместо да уживаат во удобноста на владините фотељи, време е да излезат меѓу граѓаните и да го слушнат нивниот глас. Гласот што сè погласно вели: доста е со понижување! Ако веќе самите не можат да го слушнат албанскиот глас сега, ќе го слушнат на престојните избори, какви и да се тие, додаваат од ДУИ.