ВЕСТ НА ДЕНОТ
ЕУ ги одобри нашите дигитални сертификати за КОВИД-19
Европската комисија денеска го усвои националниот Дигитален сертификат на Република Северна Македонија и истиот го смета за еквивалентен на Дигиталниот сертификат на ЕУ, информира Министерството за здравство.
Северна Македонија, посочуваат, е прва земја во регионот за која сертификатите за Ковид-19 ќе се сметаат за еквивалентни на Дигиталниот сертификат на ЕУ.
ИЗЈАВА НА ДЕНОТ
„Да продолжиме сите да се враќаме кон граѓаните, се надевам и тој, еднакво за сите. Кога тоа г. Мицковски ќе го прави и ќе настапува во една мултиетничка и мултирелигиска држава тогаш може да очекува поддршка од сите подеднакво. Кога се обраќате само кон една заедница, тогаш може да очекувате поддршка само од таа заедница. Еве изборите се пред нас и јас уште еднаш само ќе потврдам дека причините за кои кажувам ќе победуваме доста долго како коалиција, а тие е губат е токму тој национализам којшто го имаат во една мултиетничка земја, навистина ќе биде причина за следниот пораз на ВМРО-ДПМНЕ, но секако опозицијата е опозиција, одговорноста е кај владејачките партии, доминантно“, изјави премиерот Зоран Заев во Јегуновце каде што заедно со министерката за образование и наука, Мила Царовска и градоначалникот Дарко Блажески присуствуваа на пуштање во употреба на спортската сала во ООУ „Александар Здравковски”.
ФЛЕШ ВЕСТИ
ДИСКРИМИНАЦИЈА Комисијата за спречување и заштита од дискриминација (КСЗД) утврдила директна продолжена дискриминација врз лицата со физичка попреченост од страна на подрачното одделение на Државната изборна комисија (ДИК) во Карпош.
БЛОКАДИ Поради блокираниот закон за лични карти, преку 40 илјади лични карти не се издадени на подносителите на барањата, од кои некои од нив аплицирале за првпат. Законот за личните карти е блокиран со амандмани од Левица. Премиерот Зоран Заев истакна дека ако не се донесе законот, постои можност за гласање и со истечена лична карта.
АПЕЛ Не фалат обрасци за лични карти, системот е добар, само треба да се изгласа Законот за лични карти, напиша министерот за внатрешни работи Оливер Спасовски на неговиот Фејсбук профил.
ОБРАЗОВАНИЕ Министерството за образование и наука (МОН) ги почитува сите инструкции што се даваат од здравствените власти. Ако има различни инструкции за општото дејствување во одредена општина или во одреден регион и МОН ќе се прилагоди на тоа.
РЕАКЦИЈА Сите пријавени граѓани се евакуирани од Авганистан и во моментот немаме информации за наши државјани кои се во загрозувачка ситуација или на кого му е потребна асистенција за евакуација, изјави денеска премиерот Зоран Заев.
ИНИЦИЈАТИВА: НАПРАВИ РАЗЛИКА, ПОЧИТУВАЈ ГИ РАЗЛИЧНОСТИТЕ
Рита Бехадини, новинарка и активистка за правата на жените, во видео порака за иницијативата на ЦИВИЛ „Направи разлика, почитувај ги различностите“ истакна дека кога ќе се почитуваме едни со други, ќе ги почитуваме разликите.
Музичарката и хуманитарката Кристина Арнаудова со видео порака во иницијативата на ЦИВИЛ „Направи разлика: Почитувај ги разликите“ вели дека во неволја и сиромаштија никој не те прашува што си.
ЦИВИЛ отвори повик за аплицирање за краткорочни изборни набљудувачи на ЦИВИЛ. Повикот ќе биде отворен до 30 септември 2021 година, но на заинтересираните им се препорачува да се пријават што поскоро.
ЛИНК ДО АПЛИКАЦИЈА
СЛОБОДНА ЗОНА
„И тука се случува еден своевиден парадокс. Со интензивирањето на говорот на омраза и навредите од страна на антиваксерите преку социјалните мрежи и на протести, упатени кон вакцинирањето, вакцинираните, докторите, министерот, Владата, во исто време се зголемува бројот на вакцинирани лица во земјава. Дали антиваксерите, ненамерно, се ставија во служба на имунизацијата?
Можеби здравствените служби во земјава треба да им заблагодарат на антиваксерите за зголемениот интерес за вакцинација кај населението и зголемениот број на вакцинирани“, пишува Драган Мишев во колумната „Антиваксерскиот протестен балон издиша како дупнат со игла“.
Д. Муратов
