Кој било предлог од Владата, кој би ја подобрил нашата преговарачка позиција со ЕУ, ние ќе го поддржиме, но неопходно е ставовите да ги усогласиме преку дијалог на најголемите политички партии, вели лидерот на СДСМ, Венко Филипче.
Тој во интервју за „360 степени“ на МРТ 1, меѓу другото, вели дека иницира лидерска средба не заради својот политички рејтинг, туку поради тоа што е потребен национален консензус и заедничко толкување на договорот и протоколите од летото 2022 година.
-Овие прашања во однос на преговорите со ЕУ, тоа е еден процес којшто ние не можеме да го занемариме. Тоа е еден процес којшто очигледно е дека различно се толкува, различно се прикажува, се користи за партиски ПР пред или после секој изборен циклус. Мислам дека по примерот на други земји, за тоа прашање е многу важно да имаме заеднички ставови“, изјави Филипче.
Осврнувајќи се на начините за деблокада за кои деновиве зборуваше претседателката Гордана Сиљановска-Давкова, а кои предвидуваат носење декларација од Европскиот парламент за афирмација на македонскиот идентитет и јазик, став од Советот на ЕУ дека историската комисија не може да биде основа за вето во текот на преговорите (или потпишување трет протокол со Бугарија), како и спроведување на некоја од пресудите од Стразбур за формирање здружение на Македонците кај источниот сосед, Филипче вели дека не само што ќе се согласат туку и ќе се заложат за такво нешто во европските институции.
-Што и да биде од ова на масата, кој било предлог, ние ќе дадеме поддршка. Еве, ќе се ангажираме во Европскиот парламент преку групата на социјалисти и демократи таков еден документ, декларација или како и да се вика тој документ, да биде изгласан. Час поскоро. Иако сметам дека за историската комисија е јасно дефинирано дека не влијае на преговорите, еве, се согласувам, апсолутно, ако може убаво да се дефинира и јасно да стои во некој нов, трет протокол, како што најави претседателката, ние даваме поддршка, наведува Филипче.
Во однос на обвинувањата од владејачката ВМРО-ДПМНЕ дека блокираниот ЕУ-процес е последица на политиките на претходната влада, претседателот на СДСМ вели „тоа е завршена работа и цената ја плативме на изборите“.
-Жалам што премиерот одби лидерска средба. Сметам дека малку е лицемерно ден-два претходно да повикува на национален консензус, а притоа да не е спремен на маса да дебатираме што е важно за националниот консензус, кои се тие прашања околу коишто треба да се обединиме, да постигнеме консензус за да можеме да продолжиме напред и притоа да водиме сметка дека ние не сме бинационална туку мултинационална држава, посочува Филипче.
Тој појасни дека токму на денешниот состанок на Националниот совет за евроинтеграции го презентирал предлогот за како да се надминат отворените прашања поврзани со преговарачката рамка. Како клучен пример посочи еден од протоколите во рамки на францускиот предлог.
-Еден од протоколите во рамките на францускиот предлог, којшто го содржи и образложува работењето на историската комисија, практично кажува дека работата на историската комисија воопшто не е предуслов за нашите преговори во еден момент да бидат запрени, истакна Филипче.
Според него, ваквите дилеми бараат јасна дебата и вклучување на стручна јавност за да се види дали различно го толкуваат протоколот. Тој апелира да се викнат експерти, укажувајќи дека стагнацијата во евроинтегративниот процес има реални последици.
-Едноставно, сметам дека на овој начин владата не прави ништо – ние стагнираме. Црна Гора и Албанија одат напред. Времето ќе помине за час – за две-три години, една од овие или двете земји веќе ќе бидат на прагот на Европската Унија, тоа ќе биде многу фрустрирачки за народот којшто живее тука, предупреди тој.
За договорот влада со влада со Британија, тој укажа на тоа дека сè уште не и е познат на јавноста, иако станува збор за историски највисока сума на задолжување под нејасни услови, што прави сомнеж за целиот процес. Филипче, изрази сериозна загриженост, како што вели, за нетранспарентноста и потенцијалната нерамноправност во изборот на компании за реализација на стратешките инфраструктурни проекти.
-Законот за јавни набавки во овој случај нема да може да важи. Со самото тоа што однапред знаеме дека ќе учествуваат британски фирми, тоа значи дека многу веројатно тие се предодредени, истакна Филипче.
Дополнително, тој потенцираше дека за проекти кои ги надминуваат мандатите на една влада мора да се постигне поширок политички договор. Како пример за ваков пристап, тој го посочи обидот за заедничка работа на проектот за новиот клинички центар.
Во однос на предлог-законот за помош на семејствата погодени од трагедијата во Кочани, кој што, вели, ВМРО-ДПМНЕ го блокираше, Филипче порача дека предлогот нема никаква врска со ПР или политичка калкулација.
-Нема ни ‘П’ од популизам во овој закон – тоа се реални потреби. Тоа за Кочани оваа Влада што го прави е греота. На луѓето стварно им е потребна помош и поддршка, вели Филипче.
Тој посочи дека ВМРО-ДПМНЕ систематски блокира закони што се во интерес на граѓаните: „Не поддржаа закон за минимална плата, за плата на работниците во приватниот сектор, за ДДВ на храна, за ДДВ на струја – ниту еден закон што го олеснува животот на граѓаните оваа Влада не поддржува“, рече Филипче.
Фото: СДСМ
