Германија и Франција во нон-пејпер до ЕУ бараат да ја реши кризата во БиХ и да го изолира Милорад Додик

Владите на Германија и Франција им предложија на земјите-членки на Европската унија да ја редефинираат својата политика кон Босна и Херцеговина со цел решавање на моменталната политичка криза во таа земја, што вклучува порешителен одговор на постапките на лидерот на босанските Срби Милорад Додик, потврдија за Хини дипломатски извори, пренесува 24.сата.хр.

Германско-францускиот нон-пејпер, кој сега има статус на работен материјал, на крајот треба да биде предмет на дискусија и донесување одлуки во Политичкиот и безбедносен совет на Унијата (PSC), а содржи оценка дека сегашната криза во БиХ е најтешкиот предизвик за нејзиниот суверенитет, единство, како и функционален и територијален интегритет од потпишувањето на Дејтонскиот договор во 1995 година.

Во него, исто така, се наведува оценка дека уставниот поредок на БиХ е изложен на директен напад од Република Српска откако претседателот на тој ентитет, Додик, беше осуден на затвор во прв степен поради неспроведување на одлуките на високиот претставник за БиХ.

Наведени се сите закони и одлуки донесени од Парламентот на РС од февруари оваа година, кога беше изречена пресудата, а со кои се обиде да се оспори авторитетот на БиХ како држава, со потсетување дека и ЕУ и нејзините членки јасно и недвосмислено ги осудија ваквите дејствија, особено затоа што тие се во директен конфликт со напорите за приближување на БиХ кон членство во ЕУ.

Германија и Франција сметаат дека клучот за решавање на моменталната криза во Босна и Херцеговина е како ќе реагираат властите и политичарите во земјата, наведувајќи дека надворешното влијание треба да остане „ограничено“, но нагласуваат дека целта на ЕУ мора да остане зачувување и изградба на мирна, стабилна, суверена и независна функционална држава Босна и Херцеговина.

Тие ја гледаат непосредната цел во укинување на неуставните закони во РС и повлекување на нацрт-верзијата на новиот устав на тој ентитет, што го охрабри и Додик. Тие наведуваат дека за да се постигне оваа цел мора да се истражат „сите можности“, а трајното решение на кризата е дефинирано како „целосно и неповратно враќање на Република Српска во уставниот поредок на Босна и Херцеговина, повторно залагање на босанските Срби за правилно функционирање на државните институции и нивно повторно залагање за преземање на сите релевантни чекори утврдени во препораката на Европската комисија од октомври 2022 година за напредок во процесот на пристапување во ЕУ“.

Тие, исто така, предлагаат построга политика на санкции и ги повикуваат државите, доколку не се постигне договор за ова на ниво на Унијата, поединечно да посегнат по „привремени и реверзибилни рестриктивни мерки“ чија цел е да предизвикаат промена во однесувањето на одговорните за кризата, додека комуникацијата со опозицијата и граѓанското општество во РС би била зајакната.

– Контактите на високо ниво со осудени или обвинети лидери на РС треба да се прекинат – се наведува во нон-пејпер документот.

Иако требаше да остане тајна, содржината на овој документ беше објавена во јавноста, а за неа се дискутираше оваа недела во Советот за национална безбедност на Србија. Шефот на тоа тело и прв човек на српската армија, генерал Милан Мојсиловиќ, изјави дека Александар Вучиќ ги информирал за содржината на нон-пејперот, наведувајќи дека тој „ја отежнува позицијата на РС“.

Д. Т.