ВЕСТ НА ДЕНОТ
Утре почнува увидот на Избирачкиот список
Јавниот увид на Избирачкиот список за локалните изборите ќе започне утре и ќе трае до 9 септември. Тогаш ДИК на увид ќе ја стави новата состојба на податоци на Избирачкиот список, што ќе се користи на денот на изборите.
Во овој рок граѓаните барањето за запишување, бришење или дополнување во Избирачкиот список треба да го достават писмено до подрачните единици или канцеларии на ДИК или електронски да се обратат до Комисијата и притоа да достават соодветни докази. Рокот за заклучување на Избирачкиот список со сите промени, како од граѓаните така и од политичките партии е 24 септември, додека Избирачкиот список финално треба да биде потпишан до 1 октомври.
ИЗЈАВА НА ДЕНОТ
„Нема потреба од ширење паника и неточни информации зашто МОН и Министерството за здравство дневно ја следат состојбата и доколку добиеме препорака за промена, во истиот момент ќе бидеме спремни да промениме се што ќе ни биде кажано“, изјави денеска министерката Мила Царовска, повторувајќи дека од 1 септември училиштата ќе бидат отворени за сите ученици и дека тоа е прво и нај посакувано од трите сценарија за почеток на новата учебна година.
ФЛЕШ ВЕСТИ
ПОПИС Сите заинтересирани кандидати за реонски попишувачи можат да се пријават на онлајн апликацијата достапна на www.stat.gov.mk и popis2021.stat.gov.mk до 25 август.
КОВИД-19 Невакцинирани 85 отсто од новите КОВИД случаи и 91 процент од хоспитализираните.
КАНДИДАТИ ВМРО-ДПМНЕ на последната седница на Централниот Комитет усвои нови 19 кандидати за градоначалници за претстојните локални избори. На денешната прес конференција, потпретседателот Владо Мисајловски ги објави имињата на кандидатите на опозициската партија за неколку општини. Повторно изостана името на кадидатот за градоначалник на Скопје.
ДИК Во подрачните одделенија и канцеларии на Државната изборна комисија (ДИК) заклучно до вчера собрани се потписите за четири независни советнички листи за локалните избори што ќе се одржат на 17 октомври. Тоа се листата на кандидати за советници за Општина Центар, со носителот Јана Белчева – Андреевска, советничката листа за општина Кавадарци со Петар Камчевски, советничката листа за општина Росоман со Ристо Сакалиев и советничката листа за општина Кочани со носителот Аки Акиев.
МОНИТОРИНГ НА ЦИВИЛ
ВМРО-ДПМНЕ, како и Левица, се ноторно познати по ширење говор на омраза и дезинформации. Тие се често опфатени во извештаите и анализите на релевантни меѓународни и домашни организации, а само една од нив е и студијата за дезинформациите во издание на Европскиот парламент.
Во еден од своите најнови напади против граѓанските организации, портпаролот на парламентарната политичка партија ВМРО-ДПМНЕ, Наум Стоилковски на Фејсбук го клевети и му се заканува на претседателот на ЦИВИЛ, Џабир Дерала.
ИНИЦИЈАТИВА: НАПРАВИ РАЗЛИКА, ПОЧИТУВАЈ ГИ РАЗЛИЧНОСТИТЕ
Новинарот и активист Дехран Муратов, ЦИВИЛ, со своето учество во иницијативата „Направи разлика: Почитувај ги различностите“ преку видео порака им порачува на граѓан(к)ите дека не треба да ги учиме нашите деца дека „сите се исти“, напротив, треба да ги учиме дека сите се различни, се раѓаат различни, но дека сите имаат исти права.
„Различностите кај нас се богатство, никако не може да бидат проклетство. Нашето општество е како една овошна салата, односно колку повеќе различни овошја има толку таа е поубава, побогата, поразлична… Исто ката и во останатите салати, на пример македонската, грчката или шопската салата е поубава ако има различни зеленчуци таа е поубава. Така е и со луѓето, доколку во едно општество има различни етникуми, различни верски заедници тогаш тоа општество е поубаво и побогато“, истакна Муратов.
ЦИВИЛ отвори повик за аплицирање за краткорочни изборни набљудувачи на ЦИВИЛ. Повикот ќе биде отворен до 30 септември 2021 година, но на заинтересираните им се препорачува да се пријават што поскоро.
СЛОБОДНА ЗОНА
„Е, мое Димче, Димче… засега седумдесет и кусур земји ќе им подадат рака на луѓето од Авганистан, а не само ние Албанија, и Косово, како што тебе ти се гледа во твојот кусоглед политикански диоптер.
Малциозноста и немањето емпатија не можат да се скријат, тие се гледаат во гневот, во лошотилакот, во ликот, ама бар срамот да знаеш да си го покриеш и да не пласираш лаги. Ако не за друго, туку за дигнитетот на професорската ти и докторска титула со која грлце искинуваш од истакнување, неа да ја поштедиш“, пишува Јане Ѓорѓиоски во колумната „Така е Димче, само ние и уште 70+ други држави ќе прифатиме Авганистанци во неволја“.
Д. Муратов
