Откако гласањето во Комисијата за мандатни и имунитетни прашања помина со 4 гласа за и 4 против, конечната одлука за имунитетот на пратеникот Трајко Велјаноски останува да се носи на пленарна седница. Претседателот на Комисијата, Павле Богоевски, по седницата изјави дека не успеале да донесат одлука поради отсуството на пратеникот на ДУИ, Агим Шаќири и дека за гласањето ќе го извести претседателот на Собранието, Талат Џафери.
„Едноставно, значи дека оваа точка ќе се испрати за одлучување на пленарна седница. Тоа што нема став, не значи дека дека е прифатено, ниту дека не е прифатено барањето за одземање имунитет, за тоа ќе одлучи Собранието“ – изјави Богоевски. Тој рече дека уште вечерва ќе го спреми извештајот и ќе му го прати на Џафери.
Седницата се очекува да биде закажана уште утре, а таму одземањето на имунитетот треба да се гласа со 61 глас за. Различни се толкувањата околу тридневниот рок до кога Собранието треба да му одговори на судот, но во кулоарите на Собранието се зборува дека тој рок завршува уште утре. Така, на Велјаноски му останува само едно деноноќие за бегство.
Јавното Обвинителство поднесе барање за притвор на експретседателот на Собранието, Трајко Велјаноски, како еден од петте организатори на крвавиот 27 април 2017. Заедно со Велјаноски осомничени се и Никола Груевски, Миле Јанакиески, Спиро Ристовски и Никола Бошковски.
Арбен Зеќири