Претседателот на косовскиот парламент Глаук Коњуфца во четвртокот вечерта ја прекина собраниската седница за да го спречи учеството на српските пратеници од Српската листа. Српските пратеници дојдоа во собраниската сала по речиси шест месеци отсуство, но беа спречени да седнат од пратениците на Движењето Ветевендосје, партијата предводена од премиерот Албин Курти, пренесуваат косовските медиуми.
Претседателот на собранието Глаук Коњуфца ги обвини деветтемина пратеници на Српската листа за, како што рече, „провокација и злоупотреба на парите на даночните обврзници со појавување само еднаш на шест месеци“.
Пратениците на Српската листа до сега без пречки се потпишуваа на седниците на собранието.
„Им се обраќам на пратениците на Српската листа кои доаѓаат и провоцираат на овој начин, авистина е нетолерантно ваквото однесување и доаѓањето во Собрание еднаш на шест месеци, за да ги злоупотребуваат парите на даночните обврзници. Од друга страна, вие се борите со Косово со секое можно средство. Одите и му стоите на готовс на вашиот шеф криминалец Милан Радоичиќ, и се осмелувате да дојдете во Собранието на Косово. Срам да ви е, оваа седница се прекинува и ве замолувам да ја ослободите сала“, рече Коњуфца.
Милан Радоичиќ, поранешен потпретседател на Српската листа, ја презеде одговорноста за нападот на 25 септември 2023 година на северот на Косово во Бањска каде беше убиен наредник на косовската полиција.
Најголемата партија на косовските Срби „Српска листа“ е претставена со девет од десет места резервирани за српското малцинство во Собранието на Косово. Но, од 2022 година тие континуирано не учествуваат на седниците на парламентот, како знак на незадоволство од постапките на косовската влада на северот на земјата.
Од крајот на 2022 година на седници се појавуваат само на секои шест месеци за да се потпишат, за да не ги загубат мандатите и да земат пратеничка плата. Според законот за пратеници, пратеникот го губи мандатот само ако не учествува на седници подолго од шест месеци.
Реакции
Две албански опозициски партии во Собранието, Демократската партија на Косово и Демократската лига на Косово, реагираа на попречувањето на Српската листа. Шефот на пратеничката група на ЛДК, Арбен Гаши за локалните медиуми изјави дека „ниту еден пратеник нема право да спречи друг пратеник да влезе во салата“.
Пратеничката на Демократската партија на Косово, Ганимете Муслиу, рече дека реакцијата на претседателот на Собранието Коњуфца и пратениците на Движењето Ветевендосје е дел од изборната кампања. Таа потсети дека пред една година упатила барање. како што вели таа, „за нетолерирање на практиката пратениците доаѓаат само да се потпишат и да ги земат парите на даночните обврзници, нанесувајќи и штета на Република Косово“.
Официјалната реакција на Белград преку српскиот министер за надворешни работи Марко Ѓуриќ се изнесе веднаш по случувањата
Ѓуриќ изјави дека акцијата во Парламентот на Косово е акција на движењето Ветевендосје, кое, според него, има за цел да го блокира учеството на српските пратеници на седницата и насилно да сака да им ги земе мандатите“.
Ѓуриќ ги повика западните дипломати да реагираат на овој настан и да „обезбедат заштита на демократските процеси и малцинските права на Косово“.
Реагираше и директорот на Канцеларијата за Косово во српската влада, Петар Петковиќ, кој рече дека акцијата покажува дека Српската листа е пречка за премиерот Албин Курти, бидејќи ги штити интересите на српскиот народ.
Д. Т.
