ВЕСТ НА ДЕНОТ
Ковачевски во Собранието ги достави предлозите за состав на новата влада и програмата за работа
Мандаторот за состав на новата влада на Република Северна Македонија и лидер на СДСМ, Димитар Ковачевски, денеска напладне на претседателот на Собранието, Талат Џафери, официјално му ги достави Предлог – составот и Предлог-програмата за работа на новата влада.
-Составот на владата ги има имињата коишто вчера ги соопштивме од СДСМ, од ДУИ, ЛДП и од Алтернатива. Ресорите се согласно со преземените одговорности во Владата и во согласност со Програмата на Владата. Програмата е континуитет на изборниот легитимитет којшто е добиен на изборите 2020 година со тоа што се вградени економските определби на новиот коалициски партнер Алтернатива, како и нови програмски цели коишто произлегоа од новите предизвици коишто се наоѓаат пред оваа влада, рече Ковачевски откако во Собранието ги достави Предлог – составот и Предлог-програмата за работа на новата влада.
ИЗЈАВА НА ДЕНОТ
Мета: Работиме и силно се трудиме за двете земји што побрзо ги одржат првите меѓувладини конференции
Не сакаме и не работиме за одвојување на Северна Македонија од Албанија на патот кон ЕУ. Работиме и силно се трудиме за двете земји што побрзо ги одржат првите меѓувладини конференции и тоа е една од причините за мојата посета, изјави претседателот на Република Албанија, Илир Мета, кој е во посета на Република Северна Македонија.
Нова рубрика „Брза пошта“ – Вашите мисли и опсервации, жолти и црвени картони, кратки белешки и пораки, отсега во брза пошта. Останете гласни!
Цивилмедиа.мк воведува нова рубрика – „Брза пошта“, каде што авторките и авторите можат да ги овековечат своите мисли, белешки и пораки. Во трката со времето, често се нема време за пишување долги и елаборирани коментари и анализи, а потребна е брза реакција. Затоа, Редакцијата одлучи да отвори таков простор кој може да послужи и како своевидна комуникациска алатка, размена на мисли и пораки, но и вовед во пошироки анализи и мислења.
ФЛЕШ ВЕСТИ
ПОСЕТА Посетата на премиерот Кирил Петков на Скопје не се откажува, туку се одложува, изјавија за БНТ од прес-центарот на Советот на министри. Засега не е јасно кога ќе се реализира. Претходно, Министерскиот совет за БНТ потврди дека Кирил Петков и шефицата на неговиот кабинет Лена Бориславова ќе се изолираат во наредните денови. Одлуката доаѓа неколку часа откако стана јасно дека претседателот на Народното собрание Никола Минчев има коронавирус.
ПАНДЕМИЈА Ем се заразени со омикрон, ем се на работа. Голем број граѓани ги игнорираат симптомите на омикрон варијантата на коронавирусот и го шират вирусот на работните места. Тие ниту се тестираат, ниту се евидентирани во листата заболени на Институтот за јавно здравје, движењето не им е контролирано, ниту пак им се знаат контактите. Ова, заедно со масовните новогодишни прослави, се причините зошто бројот на новозаразени во земјава за една недела порасна за 50 проценти и сега активни се над 10.300 случаи, вели за „Слободен печат“ д-р Ненад Лазаров, матичен лекар од Скопје.
КОМИСИЈА На Комисијата за заразни болести се разгледуваше предлогот за скратување на времето на изолација на позитивни од тестирани на SARS-CoV-2 кои се асимптоматски случаи. За овој предлог членовите ќе донесат одлука по дополнителна обемна дискусија која ќе следи во наредните денови. На денешниот состанок Комисијата ја разгледуваше и евентуалната можност за промена на почетокот на второто полугодие од учебната 2021/2022 година. Одлуката по овој предлог ќе биде донесена непосредно пред почетокот на второто полугодие.
ОБРАЗОВАНИЕ Учениците кои завршуваат средно образование и оваа година ќе полагаат државна матура како и минатогодишната генерација која се избори за два наместо три екстерни предмети и за скратени испитни програми. Новата концепција на матура што ја најавуваше Државниот испитен центар (ДИЦ) се подготвува, но ќе почне да се применува за матурантите во идната учебна 2022/2023 година.
АНТИКОРУПЦИЈА Ризикот од политичка корупција и политичко влијание е највисок. Понатаму следува ризикот од неказнивост и незадоволството од судиите. Тие се основните ризици, кои треба да ги надминеме, порача претседателката на Државната комисија за спречување на корупција, Билјана Ивановска.
ЕНЕРГЕТСКА КРИЗА Во однос на стратегијата на Владата за справувањето со кризата во енергетскиот сектор, вицепремиерот истакна дека се прават максимални напори и се обезбедени финансиски средства за да се максимизира производството на електрична енергија од домашни извори и на тој начин да се заштитат домаќинствата и малите потрошувачи.
КЛИМАТСКИ ПРОМЕНИ Глобалното затоплување продолжува и научните податоци за последните седум години покажуваат дека тие се најтоплите во човековата историја, пренесува Гардијан. Температурата на светско ниво во 2021 година била за 1,2 Целзиусови степени над прединдустриските нивоа. Ова значи дека климатските промени со несмалено темпо продолжуваат да создаваат екстремни временски услови на Земјината топка, предизвикани од емисиите на стакленички гасови.
ЕВРОПСКА КОМИСИЈА Европската комисија е внимателна во начинот на кој го користи инструментот за условување поради неговите бројни импликации, вклучително и прилагодувањето на финансиската асистенција во случај на значајно уназадување или траен недостаток на напредок, велипортпаролката на ЕК Ана Писонеро, објасни како постапува институцијата.
НАТО Црна Гора, Албанија, Словенија и Северна Македонија се воено нискокорисни земји за НАТО, а многу од таканаречените сојузници се повеќе обврска кон САД отколку активни, смета Тед Гален Карпентер. виш соработник за студии за одбрана и надворешна политика на Институтот Кито во Вашингтон.
ЕВРОПСКИ ПАРЛАМЕНТ Почина претседателот на Европскиот парламент, Давид Сасоли, објави денеска на Твитер неговиот портпарол Роберто Куиљо. Сасоли (65) почина на 11 јануари во 01:15 часот во Италија, каде што беше хоспитализиран, додаде неговиот портпарол.
