На 21 февруари 2021 година, Сашо Мијалков е недостапен за МВР за врачување на решението за куќен притвор, што како мерка на претпазливост, на барање на обвинителството го носи Кривичниот суд.
На 22 февруари 2021, од МВР за ЦИВИЛ Медиа потврдуваат дека е распишана национална потерница по Мијалков, а бидејќи лицето не е пронајдено ќе се извести судот и ќе се побара да биде издадена наредба за распишување на меѓународна потерница.
Решението за куќен притвор му се доделува за случајот Таргет-Тврдина. Пресудата треба да биде изречена на 26 февруари. Последна позната локација на Мијалков е кафулето „Дистрикт“, хотел Мериот.
Кој е овој лик?
Сашо Мијалков (познат како Бате Саше) по кого трага полицијата, своревремено синоним за страв и трепет, кога со шепот се изговараше неговото име сè додека не се појавија т.н. „бомби“ по што граѓаните почнаа да го исмејуваат и гласно да зборуваат за неговите (зло)дела. „Ало началниче“, „дагау“, „каменот од блиску доаѓа“, „му еб** ма****“, „народ гледа“… се само дел од „богатиот речник“ на Мијалков со кој се запознаа граѓан(к)ите.
МЕСТЕЊЕТО „СВАРОВСКИ“ СУДИ(ЈК)И
Главен за поставување на судии бил Сашо Мијалков. Во една од бомбите се слуша како Мијалков ја известува Софија Лаличиќ дека е избрана за судијка. На снимката се слуша како ѝ честита, а таа изненадено прашува „ме зезаш“ и продолжува да прашува за другите судии што се избрани со заедно неа.
Од разговорот се дознава дека другата избрана судијка е извесна Тупанчевска, братучетка на професорот Тупанчевски, која според Лаличиќ, како што се слуша на снимката, „со купување сваровски накит и со пу***е на претпоставените“ го заработила судиското место.
Лаличиќ користи и навредливи зборови за колешката која е избрана за судијка. Блискоста на Мијалков и Лаличиќ се познава по тоа што таа слободно му предлага кои кандидати треба тогашната власт да ги избере за судии.
„KАМЕНОТ“ ОД БЛИСКУ ДОАЃА
Екс-директорот на УБК, Сашо Мијалков и тогашниот вицепремиер Муса Џафери, во една од објавените снимки се слуша како се договараат за местење на прв човек на Врховниот суд.
„За нешто да се стопира треба да има некој разговор, не е убаво без разговор да се стопира. Ставена е точката и треба да помине. Јас зборев со Абдулаким, Али рекол ти и Али да одлучите. Може да се видиме, не можеме да ја кочиме ова работа. Ја имате единица, двојка и правобранител, заменик во апелација. Од ништо треба да стане нешто. Ако не помине денеска, ќе нѐ плукаат по весници за ништо“, вели Мијалков на снимката.
„АЛО НАЧАЛНИЧЕ“ – АПСЕЊЕ (ТОРТУРА) НА ЉУБЕ БОШКОВСКИ
Апсењето на Љубе Бошковски е една од „бомбите“ што во 2015 година ја објави лидерот на СДСМ, Зоран Заев, каде што тогашниот шеф на УБК, Сашо Мијалков разговара со уредникот на Сител, Драган Павловиќ Латас и со сопственикот на Канал 5, Емил Стојменов, за апсењето на Бошковски и им дава насоки како да се пласира во медиумите.
Разговорот меѓу Мијалков и Латас започнува со „Ало началниче…“, еден ден по предвремените парламентарни избори на (06 јуни 2011), во кое Мијалков се фали: „Сега му ја е*** мајката, а ова ќе му биде осум години… Ќе му пратам во затвор некој надарен да го е**“, на што Латас вели дека во затвор Љубе ќе се дружи со Велија Рамковски.
Мијалков нарачуваше што и како ќе се објавува по телевизиите. Во случајов, тој сакаше и да го понижи лидерот на Обединети за Македонија. Мијаков му наоѓа забелешка на Латас за снимките кои одат на прилогот на Сител за апсењето на Бошковски, со забелешка дека на „на Канал 5 три пати подобро иделе“. Вели дека има поубави снимки со Љубе како лежи на земја како говедо и за вечерните вести нарачува да пуштат поубави кадри.
Мијаков и Стојменов исто така разговараат за апсењето на Бошковски. „Ветив една работа дека од понеделник апсам, чекав да помине кампањата и почнав да апсам од понеделник и почнав од тој што е најубав за апсење, прати камери сега во суд, ќе го носат, пуштете го оригинал како што сте снимале, не се занесувајте многу“, вели Мијаков. На тоа Емил Стојменов вели: „Што ќејф да ми направиш, уште Љубчо да го уапсиш“, а Мијаков одговара: „Ќе видиме. Сега во Шутка ќе го јаде, сакам да те честам за денеска, да се видиме….“.
СЈО на 28 март 2016 отвори случај „Тортура“ каде што Сашо Мијалков е првоосомничен, а истрагата е отворена поради грубото и непрофесионално апсење на лидерот на Обединети за Македонија, Љубе Бошкоски.
ТАЧИ ВЕРЕН „ДО ГРОБ“ НА МИЈАЛКОВ
Поранешниот шеф на Управата за безбедност и контраразузнавање, Сашо Мијалков, на 31 март 2020 година од Кривичниот суд ја доби првата пресуда за случајот „Титаник 2“ покренета од Специјалното јавно обвинителство.
Според обвинението на СЈО, користејќи ја својата моќ што ја имаше во општеството и блиските односи со Мендух Тачи, во 2013 година се јавил кај Тачи и побарал од него членот на Државната изборна комисија од ДПА, Бедредин Ибраими, да гласа за поништување на гласањето во избирачко место во Струмица, иако за тоа немало основ.
Во снимените телефонски разговори, една од „бомбите“ е и разговорот меѓу Мијалков и Тачи, од кои се слуша како Мијалков од Тачи бара да се гласа за приговорот на ВМРО-ДПМНЕ во Струмица, а ова веднаш му било пренесено на Ибраими. Тачи тогаш му изјавува верност „до гроб“.
ЗАЛЕЗОТ НА МИЈАЛКОВ, 2015-2021
Како директор на УБК, Управата за безбедност и контраразузнавање, Сашо Мијалков на 12 мај 2015 година продолжувајќи го бранот оставки во Владата по објавување на „бомбите“ на тогашната опозиција СДСМ, си поднесува оставка од функцијата. И тоа три дена по 9-мајската „мала војна“ во Диво Насеље.
„Позицијата што ми беше доверена ја извршував патриотски и одговорно, пред се во интерес на земјата и граѓаните, и секогаш смело и одлучно пристапував кон секоја задача. Граѓаните најдобро знаат дека Македонија има бројни успеси во полето на кое дејствував. Дел од тие успеси беа и вистински мит во разговорите меѓу граѓаните, и ги говореа со гордост“, напиша Мијалков во оставката доставена до тогашниот премиер, Никола Груевски.
Следеа оставки на министерката за внатрешни работи, Гордана Јанкуловска и Миле Јанакиевски, министер за транспорт и врски. Иако сите тврдеа дека нивните оставки немаат врска со случувањата во Куманово, сепак, се шпекулираше дека вооружената група „била поттикната и им било ветено дека ќе бидат платени неколку милиони евра од семоќниот шеф на македонската разузнавачка служба, Сашо Мијалков (прв братучед на премиерот Груевски), со цел да се создадат мали инциденти во места населени со етнички Албанци. А медиумската паника која требало да следи потоа, би била доволна да го одврати вниманието на македонската политичка сцена од скандалите со опозициските „бомби“ и откривањето на големите корупциски скандали. Инцидентот во Куманово требаше да го одврати вниманието и да ја пренасочи Владата во пропагандна офанзива на „сигурните“ националистички води на меѓуетничките односи во Македонија“ (Сашо Орданоски, Кризата во 2015, ЦИВИЛ Медиа, 17 февруари, 2016)
По поднесувањето на оставката во мај 2015-та година за обезбедувањето на Мијалков се грижеа шест телохранители, а на располагање имаше и два автомобили и се тоа на државен трошок. Во август 2018 година МВР носи одлука за укинување на полициското обезбедување поради проценка дека повеќе не постојат безбедносни ризици.
Во меѓувреме, Специјалното јавно обвинителство отвори повеќе предмети во кои осомничен се појавува Мијалков: Таргет-Тврдина, „Трезор“, „Тортура“, Империја, Титаник 2…
За случајот Таргет-Тврдина во 2017 година СЈО му го одзема пасошот на Мијалков. На 20 ноември 2018 Мијалков завршува во истражниот затвор Шутка откако му е одредена 30 дена мерка притвор во случајот Таргет-Тврдина во кој се товари за прислушување на околу 20.000 граѓани преку три системи на следење на комуникации во УБК.
На 13 декември Мијалков понудил гаранција од 1 милион евра за да излезе од затворот. На 28 март 2019 Мијалков излегува од Шутка и оди во домашен притвор.
МИЈАЛКОВ ВО ПРЕДМЕТИТЕ НА СЈО
Империја – против Јордан Камчев, Сашо Мијалков, Ненад Јосифовиќ, Цветан Панделески, Ратка Куноска Камчева, Христина Камчева Стојческа, Зорица Арсовска, Лилјана Гајдовска, Владислав Стајковиќ, Тодор Мирчевски, Дејан Јанев, Ванче Мијалчев и Јованче Тасковски, поради постоење на основано сомнение за сторени кривични дела: злосторничко здружување, оштетување или повластување на доверители, злоупотреба на службената положба и овластување, измама и перење пари и други приноси од казниво дело во период од 2002 до 2013 година.
Тортура – Во „Тортура“ заедно со Сашо Мијалков се обвинети и поранешниот прв човек на единицата „Алфи” Ивица Антевски-Пуки и уште петмина припадници на единицата за начинот на апсењето на Љубе Бошкоски во 2011 година
Трезор – Сашо Мијалков, Горан Грујевски поранешниот началник на петтата управа, Тони Јакимовски ексшефот во кабинетот на Мијалков и Небојша Сајковиќ поранешен помошник министер во МВР се обвинети дека набавиле опрема за прислушување во Лондон во 2010 година. Набавката на опремата не одела преку МВР, туку преку компанијата „Финзи“, договор, кој според обвинителниот акт од СЈО бил фактуриран по двојно поскапа цена.
БИОГРАФИЈА – КОЈ Е САШО МИЈАЛКОВ?
Сашо Мијалков е роден во Скопје, на 15 септември 1965, дипломирал на Универзитетот Свети Кирил и Методиј на Економскиот факултет во 1998 година. Магистрирал во областа бизнис и администрација. Дипломирал и магистрирал и на Економскиот факултет во Прага во 1994 година.
Сашо Мијалков е син на Јордан Мијалков, првиот министер за внатрешни работи на Македонија, во периодот од 20 март 1991 до 19 декември 1991 година, во првата експертска влада, водена од Никола Кљусев. Постариот Мијалков погинал во сообраќајна несреќа во Србија, на 19 декември 1991 година. Негови синови се Влатко и Сашо Мијалкови, додека внук му е Никола Груевски.
И таткото на Сашо Мијалков, Јордан, е поврзан со контроверзии поврзани со неговата улога како поранешен соработник на југословенската тајна полиција, позната како „КОС“. И поранешниот шеф на македонската контраразузнавачка служба, Слободан Богоески, го посочува Мијалков како соработник со југословенската тајна служба.
Сашо Мијалков во 1990 година станал член на ВМРО-ДПМНЕ, а во периодот од 1998 до 2000 година, работел во Министерството за одбрана на местото помошник-министер за одбрана и безбедносно разузнување. Од 2000 до 2001 година е советник за безбедносни прашања во Владата на Република Македонија. Од 29 август 2006 година е назначен за директор на Управата за безбедност и контраразузнавање. На 8 март 2019 година бил осуден на три години затвор во предметот „Титаник 2“ на СЈО. Мијалков поднесе оставка од УБК На 12 мај, 2015, неколку дена по терористичкиот напад и вооружените престрелки во Диво Насеље – Куманово.
„Бест Веј Инвестмент“,„Софија Градба“, која е акционер во „Жито Полог“ и ЗК „Пелагонија“, со што станува дел од сопственичката структура и на „Здравје Радово“, се неколку од бизнисите, односно фирмите во сопственост на Сашо Мијалков, како и луксузен комплекс за домување во Прага, и уште две фирми во Чешка каде што како инвеститор е потпишана негова фирма („Миртланис“).
СЈО во еден свој случај откри дека Сашо Мијалков живее во куќа на Водно, во сопственост на фирмата Ексико, која во изминатите години стана сопственик или косопственик на повеќе фирми во Македонија, кои меѓу другото, добиваа тендери од државни институции и субвенции, а го крие од јавноста својот вистински сопственик. Тоа и го овозможуваат законите во Швајцарија, каде што е регистрирана компанијата што ја поседува Ексико.
Мијалков е сопственик и на хотелот „Мериот“, на плоштадот Македонија, каде што престојуваше за време на куќниот притвор.
Д. Муратов, Д. Тахири, Б. Јордановска
