Ситуацијата на Блискиот Исток и во Украина е многу загрижувачка и ќе има рефлексија не само кај нас, туку во цела Европа. Затоа е неопходно по дипломатски начин да се започне дијалог и да се постигне мир, истакна денеска министерот за одбрана Владо Мисајловски. Тоа е на глобално ниво, а најбитно за нас, како што кажа, е безбедносната ситуација во државата да биде стабилна и да ги имаме сите неопходни информации.
-Состојбата целосно се следи на се она што е затекнато во соседството и тука како терористички структури. Податоците оперативно се обработуваат и сите достапни информации ги споделуваме со НАТО земјите. Не постои опасност, но со тие структури секогаш мора да се биде внимателен и затоа е добро да ги споделуваме сите информации со НАТО, зашто голем дел од нив и ги добиваме од Алијансата, рече Мисајловски во одговор на новинарско прашање на денешниот отчет за 100 дена Влада.
Ние, посочи, ќе го следиме сето она што го прави НАТО и нашите стратешки партнери.
-Преку видео врска се видов со нашите тројца штабни офицери во Јужен Либан. Тие се чувствуваат добро, но ситуацијата е загрижувачка и секој ден е се потензична. Иако се чувствуваат безбедно постојано се во бункери и само изминативе денови имаше преку 300 гранатирања од кои е оштетена инфраструктурата во близина на командните центри каде се сместени. Има и борбени дејства во близина, прецизира Мисајловски.
Нагласи дека нов пакет помош за Украина ќе биде на дневен ред на следната владина седница.
-На состанокот во Рамштајн, кој е одложен поради неможноста претседателот на САД да дојде заради ураганот, ќе се разговараше за помош на Украина. Нашиот нов пакет помош за Украина веќе е на владина седница, но за се што ќе е донирано мора да имаме проценета вредност. Сега се прави со сметководствена и пазарна вредност, но мора да имаме и проценка. Во минатото се правела преку Бирото за судски вештачења. Ја правел експерт на кој никогаш не му било исплатено и не ги добивме проценките. Сега тој проценител го ангажиравме во Министерството да ни помогне за да имаме квалитетни извештаи што ќе ги доставиме до нашите партнери. По проценката ќе ги поминеме и новите пакети, рече Мисајловски.
Посочи дека во вчерашниот извештај од НАТО било посочено дека сме четврта земја по контрибуции за Украина.
-Од Украина се бара се, не само воена, туку и хуманитарна помош што може да ја понуди секоја земја членка на НАТО. Ние ќе помагаме, но пред се мора да ја заштитиме нашата земја и она што е потребна опрема за нашата Армија ќе направам се да остане тука, потенцира Мисајловски, пренесе МИА.
