Полициски кордон речиси во текот на целиот ден и ноќ ги одвојуваше поддржувачите на владејачката Српска напредна партија (СНС) и група граѓани кои се собраа пред партиските штандови во Нови Сад во недела, на 18 мај, пишуваат регионалните медиуми.
Собирот пред седиштето на партијата на српскиот претседател Александар Вучиќ во Нови Сад започна во текот на денот и заврши доцна по полноќ.
Групи граѓани почнаа да доаѓаат пред просториите на СНС во моменти додека членови партијата делеа пропаганден материјал на штандовите.
За време на неколкучасовниот собир, имаше неколку вербални судири и фрлање јајца од двете страни. Во еден момент, полицијата интервенираше против членовите на Српската напредна партија кога тие почнаа да фрлаат јајца и пластични шишиња кон граѓаните.
Меѓу активистите на СНС беа присутни локални функционери и директори на комунални претпријатија, додека од другата страна на полицискиот коридор имаше активисти и советници на опозицијата.
И едните и другите, истовремено пуштаа своја музика од озвучувањето.
По полноќ, собраните граѓани тивко им оддадоа почит на жртвите од падот на настрешницата на Железничката станица во Нови Сад, додека членовите на СНС во тој период пуштаа музика од просториите на партијата.
Градоначалникот на Нови Сад, Жарко Миќин, на својот Инстаграм профил објави дека „остро ги осудува срамните настани пред просториите на Српската напредна партија на Булеварот на ослободувањето во Нови Сад“ и „апелираше до сите да се воздржат од насилство и со своите постапки да придонесат за зачувување на редот и мирот“.
„Наместо политичка борба со аргументи и демократски дијалог, сведоци сме на обиди за заплашување, провокации и срамно однесување на опозициските активисти, што кулминираше со попречување на мирен собир на нашите активисти, вербални конфликти, па дури и фрлање јајца“, објави Миќин.
Станува збор за просториите на Српската напредна партија, од каде што, ноќта помеѓу 27 и 28 јануари, членови на СНС излегоа и претепаа група студенти, а на една студентка ѝ ја скршија вилицата со бејзбол палка.
По тој напад, тогашниот премиер на Република Србија, Милош Вучевиќ, и градоначалникот на Нови Сад, Милан Ѓуриќ, поднесоа оставки.
Исто така, просториите на СНС се наоѓаат на Булеварот на ослободувањето, недалеку од железничката станица каде што падна бетонска настрешница на 1 ноември 2024 година, при што загинаа 16 лица.
Д. Т.
