Транспарентите со зборовите „Македонија е Бугарија“ што ги истакнаа дел од бугарските пратеници и изговорените ставови од говорницата на вчерашната седница на бугарскиот парламент, се спротивни на европските вредности и на Договорот за добрососедство, се наведува во вчерашното соопштение на македонското МНР.
Македонското МНР вчера врачи остра вербална нота до бугарското МНР во која најостро ги осудува овие пораки и дека се целосно спротивни на европските вредности, пренесе и бугарската новинска агенција БГНЕС.
Според МИА, во соопштението се посочува дека земјава очекува официјалните претставници на Бугарија да го осудат експлицитниот говор на омраза и територијалните претензии кон Северна Македонија, како крајно непримерен акт кон соседна пријателска држава.
Министерство за надворешни работи на Бугарија, пак, вчера соопшти дека е подготвено да продолжи со потпишувањето на Протоколот, согласно член 12 од Договорот за пријателство и добрососедство со Република Северна Македонија.
