ВЕСТ НА ДЕНОТ: Бројот на загинати во експлозиите во Кабул се искачи на 110
Бројот на загинати во експлозиите на аеродромот во Кабул, кои вчера беа предизвикани од бомбаши самоубијци, се зголеми на најмалку 110, пренесува „Ал Џазира“.
Тасс наведува дека неколку илјади луѓе се уште се наоѓаат на аеродромот, во исчекување да го напуштат Авганистан.
Претходно денеска, талибанците соопштија дека најмалку 28 нивни членови загинале во бомбардирањата на аеродромот во Кабул, додека британските медиуми соопштија дека во нападите загинале најмалку 13 американски војници и 90 цивили.
ИЗЈАВА НА ДЕНОТ
„Врз основа на епидемиолошката состојба ќе се види какви мерки ќе има во наредните месеци кога ќе има попис и локални избори, но, ако се почитуваат протоколите нема да има проблеми, оцени министерот за здравство Венко Филипче од Тетово на новинарско прашање дали ќе има промени во мерките и поради овие два процеси.
ФЛЕШ ВЕСТИ
КОАЛИЦИЈА На денешната средба на лидерите на опозициските партии Алијанса за Албанците и Алтернатива, Зијадин Села и Африм Гаши и претседателот на ВМРО-ДПМНЕ, Христијан Мицковски, на која главна тема беа претстојните локални избор, тројцата претседатели ја констатираа неопходноста од договор за заеднички настап на локалните избори.
КАНДИДАТУРА Актуелниот градоначалник на Куманово, Максим Димитриевски, се кандидира како независен кандидат за градоначалник на Куманово на претстојните локални избори на 17 октомври.
ОБРАЗОВАНИЕ Министерот за здравство, Венко Филипче на прес-конференција во Тетово со градоначалничката Теута Арифи, рече дека наставата во средните училишта на 1 септември ќе почне онлјан и така ќе се одвива две недели, а како ќе се одвива понатаму ќе зависи од развјот на состојбата. Наставата во основните училишта, пак, на 1 септемри ќе почне со физичко присуство.
ПОДДРШКА „Северна Македонија е пријател на Словенија. Местото на Северна Македонија е во Европската унија, Словенија ќе направи се што е во нејзината моќ да станете што побрзо полноправна членка на ЕУ. Ја имате целосната поддршка на Словенија. Ќе се потрудиме да им кажеме на нашите бугарски пријатели дека и во нивен интерес е Северна Македонија да стане членка на ЕУ“, истакна Матеј Тонин заменик премиер и министер за одбрана на Словенија, чија земја е актуелен претседавач со ЕУ, на заедничката прес – конференција во Охрид со неговиот домаќин министерката за одбрана, Радмила Шекеринска.
ИНИЦИЈАТИВА: НАПРАВИ РАЗЛИКА, ПОЧИТУВАЈ ГИ РАЗЛИЧНОСТИТЕ
„Јас имам мешано етничко потекло. Меѓу моите предци има Албанци, Турци, Хрвати. Подлабоко во минатото, моите предци влечат корени – од Блискиот Исток до Италија. Еден мој пријател, писател од Белгија, пишувајќи за мене, тоа го нарече Salad Macédoine во една своја книга за Балканите“, истакна Џабир Дерала во Иницијативата на ЦИВИЛ „Направи разлика, почитувај ги различностите“.
„Цел живот сум опкружен со луѓе од најразлично потекло. Говорат на различни јазици, одат во различни храмови, некои се атеисти, некои се верници, имаат различни обичаи, слушаат различна музика…
ЦИВИЛ отвори повик за краткорочни изборни набљудувачи
ЦИВИЛ отвори повик за аплицирање за краткорочни изборни набљудувачи на ЦИВИЛ. Повикот ќе биде отворен до 30 септември 2021 година, но на заинтересираните им се препорачува да се пријават што поскоро. ЛИНК ДО АПЛИКАЦИЈА.
МОНИТОРИНГ НА ЦИВИЛ
Членови и истакнати активисти и функционери на политичката партија Левица, со сите расположливи средства, вклучувајќи и пари и платени постови на Фејсбук, дезинформации и поттикнување на меѓуетничка омраза, се обидуваат да му наштетат на пописот. Односно, како што гласи една објава на социјалните мрежи од анонимен-бот профил, „Паѓа попис, паѓа Влада“. Ова јасно укажува дека бојкотот на пописот од страна на овие радикални националисти маскирани во „левичари“ не е од патриотски, туку од политички и националистички побуди.
Лажна вест е објавата на наводна докторка дека 8 од 10 заболени се ревакцинирани со 2 дози
Порталот Булевар.мк шири лаги и дезинформации во врска со вакцинирањето против Ковид-19, објавувајќи вест со наслов: „БОМБА НА МАКЕДОНСКА ДОКТОРКА: Од 10 заболени вчера ревакцинирани со 2 дози се 8“.
Во текстот, освен лаги и манипулации, нема ниту еден конкретен доказ или аргумент. Не е напишано ниту името и презимето на „чесната докторката“ што ја споделила наводната информација, ниту каде работи итн.
Д. Муратов
