По повод инаугурацијата на новиот претседател на САД, Џо Бајден, со честитки, желби за соработка и враќањето на демократијата во САД, се огласија видни светски лидери.
Германскиот претседател Франк-Валтер Штајнмаер, неколку часа пред инаугурацијата на Бајден изрази „големо олеснување“нагласувајќи дека тоа чувство го делат многумина во Германија.
– Се радуваме што САД како незаменлив партнер во иднина повторно ќе биде со нас за многу прашања: во заедничката и солидарна борба против пандемијата на Ковид-19, глобалната климатска заштита, безбедносните прашања, истакна Штајнмаер во видео-порака.
Штајнмаер изјави дека разликите во ставовите нема да ги раздвојуваат двете страни“, туку дека на уште поинтензивен начин ќе бараат заеднички решенија.
Кремљ оцени дека подобрувањето на односите помеѓу Русија и САД исклучително зависи од „политичката волја“ на Џо Бајден, кој денеска во Вашингтон положува заклетва како 46. претседател на САД.
– Во Кремљ никој не се подготвува за оваа инаугурација. Тоа ништо нема да смени за Русија, која, како што е случај низа долги години, ќе го продолжи своето постоење настојувајќи да има добри односи со САД, изјави портпаролот на Кремљ, Дмитриј Песков.
Тој додаде дека оживувањето на односите помеѓу Москва и Вашингтон зависи од „политичката волја“ на Бајден и неговата администрација. Претходно, претседателот на Русија, Владимир Путин навести дека доаѓањето на Бајден во Белата куќа не носи опуштање.
Британскиот премиер Борис Џонсон, неколку часа пред инаугурацијата на Џо Бајден за претседател на САД, изјави дека се радува на нивната соработка за „заедничките приоритети“.
– Како што реков кога разговарав со него за неговиот избор за претседател, се радувам на соработката со него и неговата нова администрација, на јакнењето на партнерството меѓу нашите земји и соработката на нашите заеднички приоритети: справување со климатските промени, намалување на ризикот од пандемијата и зајакнување на нашата трансатлантска безбедност, рече Џонсон во Парламентот.
-НАТО и Европската унија се радуваат на идната соработка со новоизбраниот претседател Џо Бајден за зајакнување на врските со САД, изјави генералниот секретар на Алијансата.
„Со нетрпение очекуваме да работиме со новоизбраниот претседател Џо Бајден за зајакнување на американско-европските врски во време кога се соочуваме со глобални предизвици на кои никој од нас не може да се справи самостојно“, наведе генералниот секретар на НАТО Јенс Столтенберг на својот профил на Твитер по работната вечера со претседателот на Европскиот совет, Шарл Мишел, ден пред инаугурацијата на американскиот претседател.
– Го поздравувам инаугурирањето на претседателот Џо Бајден. Денеска отвораме ново поглавје и нестрпливо ја очекувам нашата тесна соработка, напиша Столтенберг на Твитер, веднаш откако Бајден положи заклетва како 46. претседател на САД, изјави Столтенберг.
Иранскиот претседател Хасан Рохани апелираше до новоизбраниот претседател на САД Џо Бајден земјата да се врати на нуклеарниот договор од 2015 година и да ги укине санкциите против Исламската Република Иран.
– Топката сега е во американско поле. Ако Вашингтон се врати на нуклеарниот договор, ние исто така целосно ќе ги почитуваме нашите обврски од договорот, нагласи Рохани.
Тој се осврна и на претседателскиот мандат на Доналд Трамп.
– Кариерата на Трамп заврши денеска и неговата политика на максимален притисок врз Иран целосно пропадна, додаде Рохани.
Претседателот на Европскиот парламент, Давид Сасоли изјави дека „светот има потреба од силна врска меѓу Европа и САД“, изразувајќи очекување за соработка во заштита на природата и борбата со нееднаквоста.
И Папата Франциск упати честитка до Бајден.
-Се молам на Бога да ги насочиш своите напори за помирувањето во САД и во светот, порача денеска поглаварот на Римокатоличката црква, папата Франциск, во честитката до американскиот претседател Џо Бајден, кој пред неполни два часа беше инаугуриран на највлијателната позиција во светот.
Папата Франциск испратил порака до 46. претседател на САД веднаш по положувањето на заклетвата и изразил надеж дека Бајден ќе работи на создавањето општество со вистинска правда, слобода и почитување на правата и достоинството на секој поединец, особено на најсиромашните, најранливите и на оние кои немаат право на глас.
Претседателот на Република Северна Македонија, Стево Пендаровски , премиерот Зоран Заев на покана на американската амбасада , заедно со Амбасадорката на САД во СРМ Кејт Брнз вчера ја проследија инаугурацијата на Џо Бајден.
Пендаровски на својот официјален профил на Фејсбук изрази честитки до новиот претседател на САД.
– Честитки до новиот американски претседател Џо Бајден.
САД се наш стратешки партнер кои секогаш ја поддржувале демократијата во земјава и нашите евро-атлантски интеграции.
Честитки до Камала Харис, првата жена потпретседател на САД, изјави Пендаровски.
– Претседателе Бајден, се радувам на времето пред нас во кое верувам дека ќе го продлабочиме сојузништвото меѓу Северна Македонија и САД, како и блиските врски и пријателството меѓу нашите граѓани, напиша Заев на ФБ.
Д.Т.