Премиерот Зоран Заев се сретна со новоименуваната амбасадорка на САД во земјава, Кејт Мари Брнз. Заев ѝ посака добредојде и успешен мандат на амбасадорката Брнз во Северна Македонија и изрази благодарност за одличната работа на претходниот американски амбасадор Џес Бејли и заменик шефот на мисијата, Микаела Швајцер Блум.
Еден од долгорочните интереси на нашата земја е натамошното интензивирање на билатералната политичка и економска соработка со САД, како и посветеноста на реформската ЕУ агенда за достигнување конкретни резултати во областа на владеењето на правото, антикорупцијата, реформите во безбедноста и јавната администрација, како што нагласи премиерот.
Премиерот Заев и амбасадорката Брнз се согласија дека Северна Македонија останува стабилен стратешки партнер на САД, фокусиран на заедничките заложби за безбедност, слобода и демократски просперитет во регионот, како и за заедничките активности во борбата против тероризмот и другите закани кон мирот во светот.
На средбата беше изразена подготвеност за прифаќање на обврските кои произлегуваат од полноправното членство на НАТО до крајот на 2019 година и почетокот на 2020 година, како што е зголемувањето на БДП од 0,2% годишно на 2% до 2024 година, модернизација на армиските капацитети и зголемување на учеството во заеднички мисии.
Амбасадорката Брнз на средбата рече дека Соединетите Држави со нетрпение очекуваат во наредните месеци да ѝ посакаат добредојде на Северна Македонија како 30-та членка на НАТО, и додаде дека ќе ги вложи своите капацитети и досегашно искуство за успех на економската и политичката соработка меѓу САД и РСМ.