Во изминативе 18 години има над 60.000 ученици помалку запишани во основните училишта, според податоците од Државниот завод за статистика. Драматичниот пад на бројот се гледа и од инфографикот на „Рефлектор“, како и од податоците што се јавно достапни на веб страницата на Државниот завод за статистика.
Во 2000/2001 година во државава имало 249.375 ученици во основните училишта низ земјава, додека во 2018/2019 година 188.102 ученици, каде точната разлика е 61.255 ученици.
Според податоците на Државниот завод за статистика најмалку ученици во основните училишта има во 2018/2019 година има во општина Зрновци, односно само 155 ученици. По Зрновци доаѓа општина Лозово, со 193 ученици во основните училишта за 2018/2019 година.
Општина со најмногу ученици во основните училишта за 2018/2019 година е Куманово, со 10.338 ученици, а втора општина е Тетово, со 9.947 ученици.
Оваа појава на намалување на бројот на ученици може да се поврзе со наталитетот во Македонија, односно живородените деца.
Во 2018 година, во државава се родени вкупно 21.484 деца, од кои живородени се 21.333. Бројот на живородени деца во 2018 година, во споредна со 2017 година е намален за 1.9 отсто, според податоците на Државниот завод за статистика.
Во 2017 година се родени вкупнo 21 946 деца, од кои 21.754 живородени. Бројот на живородените деца во 2017 година, во споредба со 2016 година е намален за 5.4 отсто.
Покрај намалувањето на наталитетот, може да се забележи зголемување на иселувањето од државава.
Како најголем проблем за тоа може да се посочи кон нискиот економски стандарт во државава. Овој проблем не се појавува преку ноќ, веќе долго време сме сведоци на иселувањето или „печалбарството“ на одредено време во странство.
Според податоците на Државниот завод за статистика, во првото тримесечје од 2019 година, активното население изнесува 960.743 лица, од кои вработени се 789.414, а невработени се 171.329 лица, со што стапката на невработеност изнесува 17.8 отсто.
Последните податоци од Еуростат покажуваат дека од Западен Балкан во земјите на ЕУ минатата година се отселиле 228.000 жители. Само од Македонија изминатата година се иселиле 24.300 жители.
Во програмата на Владата од 2016 година, во планот за живот стои и дека ќе направат младите да останат во Македонија, каде пишува дека ќе обезбедат достоинствен живот и повисоки плати за сите граѓани, дека Македонија ќе стане членка на НАТО и Европската унија, бидејќи ги споделува истите вредности и на своите граѓани им ги должи истите стандарди и придобивки.
Останува да видиме колку време ќе ни треба на сите нас да го спроведеме овој план или ќе ни останат градовите и селата низ Македонија речиси празни, како сега.
Ангела Петровска
