Според истражувањето на Институтот за економија и мир, Северна Македонија го има петтото најголемо зголемување во состојбата за мир на Глобалниот индекс за мир во 2021 година, со 5,2 проценти подобрување на нејзиниот резултат. Земјата, какошто стои во извештајот, се искачи за 11 места на ранг -листата на Глобалниот индекс за мир и сега е рангирана на 40. место. Се нагласува дека зголемувањето на мирот во голема мера беше поттикнато од подобрувањата во доменот на тековните конфликти.
„Најголемо подобрување имаше во „показателот за интензитетот на внатрешниот конфликт“ и сега е на најниско ниво од 2016 година. Конфликтот со Грција e решен по потпишувањето на Договорот од Преспа, иако Бугарија продолжува да ги блокира преговорите за членство на Северна Македонија во ЕУ. И покрај некои поделби во земјата околу Договорот од Преспа, прашањето не е толку поларизирано како што беше пред една година“, се наведува во анализата на Институтот за економија и мир.
Во доменот безбедност и сигурност, имаше подобрувања во политичкиот прогон, стапката на убиства, стапката на затворање и влијанието на тероризмот. И покрај овие подобрувања, Северна Македонија забележа влошување на перцепцијата за криминалот, се вели во извештајот.
Ова е четврта година по ред како Северна Македонија бележи подобрувања на доменот безбедност и сигурност.
Европа останува најмирен регион во светот. Од рангираните земји во Европа, Северна Македонија е на 27 место и е најбезбедна земја на Западен Балкан – Србија (44. место), Албанија (48. место), Црна Гора (51. место), Босна и Херцеговина (72. место) и на 80. место од земјите од Западен Балкан се наоѓа Косово.
Исланд продолжува да биде најмирната земја во светот, позиција што ја зазема од 2008 година. Авганистан е најмалку мирна земја во светот четврта година по ред, па следат: Јемен, Сирија, Јужен Судан и Ирак.
Поголем дел од земјите во Европа и Западен Балкан бележат напредок во состојбата за мир, безбедност и внатрешна стабилност.
Глобалниот индекс за мир, во 15-то издание по ред, рангира 163 независни држави и територии
според нивното ниво на мир. Овој извештај ја претставува најсеопфатната досегашна анализа за трендовите во мирот, неговите економски вредност и како да се развијат мирни општества, пренесува Фронтлајн.
