Луѓето што излегоа на улица, огромното мнозинство од нив, наспроти илјадапати гебелсовски повторуваниот конструкт дека биле луѓе кои протестирале за пари од „куферчето на Сорос“, за функции, вработувања, ухлебување..се луѓе со идеали за подобар живот за сите, за правда и еднаквост за сите, луѓе со чувство за граѓанство, општественост, луѓе со интегритет.
Тие се оние што и денес ги менуваат работите на подобро, а не оние „што не се бават со политика“, „исташите“, или оние што се уште живеат во негирање на децениското уништување на општеството што кулминираше за време на заробената држава на мвро-вмро.
Погледнете добро што се случува во јавноста. Најрелевантната критика кон сегашната власт, најсилниот притисок, доаѓа од луѓе кои беа заедно во Шарената револуција со оние што беа избрани од граѓаните или решија да влезат и да придонесат за остварување на заедничките идеали во институциите.
Се случува нешто што беше незамисливо пред години, се откриваат злоупотреби и криминали на луѓе кои јавноста ги врамува како блиски до власта. Да не зборуваме за многуте пати, во кои власта ретерираше под притисок на јавноста и ги поправаше пропустите, нешто што не се случуваше во време на „безгрешниот“ Грујо. Беше незамисливо.
Сето тоа, транспарентноста, отвореноста, далеку полесните можности да се откриваат злоупотреби без никаков притисок, е резултат на Шарената револуција, на луѓето од неа кои продолжија принципиелно да критикуваат, да аргументираат и да нудат решенија, но и на оние што влегоа во институциите со намера да ги реализираат заедничките идеали, да ги слушаат граѓаните, да поправат пропусти грешки, да понесат одговорност, да бидат секогаш на линија на она за што заеднички се бореа со граѓаните во изминатите години.
Тој резултат не е на опозицијата која е одлепена од реалноста, која не се дистанцира од груевизмот и уште дејствува под неговите диктати и методи. Ниту пак на разно – разните радикални групировки.
Секако, не треба да се бега од фактот дека меѓу нас имало и опортунисти. Ги има секаде. Но се гледа и денес, и во последниве години, а ќе се види и во иднина, кој је кој. Времето брзо и се побрзо ќе ги открива оние што во целата приказна влегле за лични придобивки, како и оние што ќе останат доследни на идеалите. Овие времиња нудат шанси за излизгување и за докажување на претек.
Ќе повторам, сега засега, тоа е нашата движечка сила, а не плукачите, мразачите, националистите, насилниците, кои стојат спроти нас. Тие од тоа време и десетгодишната девастација на земјата во која активно учествуваа, ниту се оградуваат, ниту пак ги менуваат методите и пораките кон сите граѓани, продолжувајќи да сеат поделби и омраза.
Тие што го вртат тркалото на напредокот сега се токму шарените револуционери, демонстрирајќи интегритет, морал, па и високо чувство за одговорност секогаш кога е потребно. И во власта, и вон власта. Затоа и ќе бидат и понатаму плукани од оние што знаат само да мразат и да слугуваат на криминалци и насилници, но ќе издржат и, како што ги победија началниците тогаш кога беа најсилни, така, а и многу полесно, ќе ги победат и сега.
#PoslushajteNacalnici
#DoKonecnaPobeda
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.