По нашето нелегално задржување од израелските власти, започнуваме штрајк со глад. Оваа одлука не е личен избор, туку колективен став против криминалот што се врши против палестинскиот народ и континуираното кршење на секоја смисла на меѓународното право, пишува во соопштението потпишано од 11 грчки активисти дел од флотилата „Глобал Сумид“, што го објави грчкото движење „March to Gaza Greece“, јави дописничката на МИА од Атина.
Бараат итно ослободување на сите членови на Глобалната флотила и додаваат дека сите обвиненија, „како оние според „законот против тероризам“ на Израел се лажни, измислени и дел од обидот за криминализација на меѓународната солидарност“.
Утрово и доцна синоќа, движењето „March to Gaza Greece“ одржа протести пред Министерството за надворешни работи на Грција во центарот на Атина, а претпладнево побара средба со раководството, по што нивни претставници беа примени од заменичката МНР Александра Пападопулу.
Во флотилата „Глобал Сумид“ учествуваат и пет грчки брода со 27 лица од Грција, а сите се задржани од израелските власти, а портпаролката на грчко МНР Лана Зохиу на брифингот со новинарите утрово информираше дека сите грчки граѓани се во добра здравствена состојба, дека официјална Атина е во континуирана комуникација со амбасадата во Тел Авив, но и дека грчката страна достави демарш до Израел.
