Советот на Град Скопје, на следната седница ќе одлучува за измена на цената за час паркирање на јавните површини и паркиралишта во денови кога ќе бидат прогласени вонредни мерки поради надминување на праговите на ПМ-10 честичките.
Ваквата одлука ќе се однесува на јавните површини и паркиралишта со кои стопанисува „Градски паркинг“.
„Со оваа измена, градоначалникот на Град Скопје по прогласување вонредни и интервентни мерки во одредени денови поради загадувањето на воздухот, има можност да даде предлог на одредени паркиралишта цената за паркирање двојно да се зголеми само во тие денови. Во случај на енормно загадување на воздухот, ова би се применило во централното градско подрачје за да се стимулираат граѓаните кои патуваат во овој дел од градот да користат јавен превоз со цел намалување на сообраќајниот метеж, а со тоа и намалување на количината на издувни гасови од возилата кои го загадуваат воздухот“, соопштуваат од Град Скопје.
Оттаму додаваат дека статистичките бројки покажуваат напредок во однос на намалување на загаденоста на воздухот по сите преземени мерки изминативе месеци.
„Највисоко измерената вредност на концентрација на ПМ 10 во периодот јануари-септември имаше во 2016 година – 560.3 микрограми на метар кубен, во 2017 година највисоко измерената вредност беше 380,2 додека во 2018 година највисоко измерена вредност е 334.9. Веруваме дека сите мерки за намалување на загадувањето што Градот ги презема изминатава година влијаат на намалување на концентрацијата на ПМ10 честички во воздухот“, велат од Град Скопје.
Во централното градско подрачје ЈП „Градски паркинг“ стопанисува на околу 28 паркинзи, на кои цената за час паркирање се движи од 25 до 100 денари.
Вредноста на ПМ-10 честичките синоќа беше шест пати повеќе од максимално дозволената граница.
К. С.