Претседателот на Република Северна Македонија, Стево Пендаровски, денеска оствари телефонски разговор со претседателот на Република Албанија, Илир Мета, во кој изрази длабоко сочувство за жртвите и повредените во земјотресот што рано изутрината ја погоди Албанија.
Пендаровски понуди поддршка на претседателот Мета, а Кабинетот е во постојана координација со Кабинетот на претседателот на Владата на РСМ, преку заедничка активност да им се пружи помош и поддршка на семејствата на загинатите и повредените граѓани на Албанија.
Пендаровски, во име на граѓаните на РСМ, упати и телеграма со сочувство до претседателот Мета.
„Со длабоко жалење ја примив веста за земјотресот кој предизвика вистинска трагедија во Република Албанија и длабоко жалам за загубените животи и огромните штети од оваа ужасна природна катастрофа.
Во овие тажни моменти за Вас, за граѓаните на Вашата земја и семејствата на жртвите, повредените и оние кои останаа без своите домови, дозволете ми, од името на граѓаните на Република Северна Македонија и од мое лично име да Ви упатам изрази на длабоко и искрено сочуство.
Почитуван господине Претседател, длабоко сум уверен дека хуманоста и солидарноста ќе помогнат во ублажувањето на последиците од оваа голема трагедија.
Ве молам, господине Претседател, изразите на длабоко сочувство да ги пренесете до ужалените семејства и до народот на Албанија“, стои во телеграмата упатена до Мета и граѓаните на Албанија.
