Студентскиот пленум на Техничкиот факултет во Нови Сад денеска гласаше – студентите во блокада бараат распишување вонредни парламентарни избори во Србија, јави МИА од Белград. Тоа беше објавено денеска нанивниот официјален профил на Х.
Како што е наведено во објавата тоа е еден од заклучоците на денешниот студентски пленум. Освен тоа, пленумот донесе низа други одлуки поврзани со оперативната работа на пленумот, како и одлуката студентите во блокадата да состават список за потенцијални вонредни парламентарни избори.
Разговорите, официјални и неофицијални, за понатамошната артикулација на протестот и начинот на исполнување на студентските барања, се водат практично од почетокот на 2025 година, а особено се интензивираа по 15 март и собирот што го свикаа студентите, објавија српски медиуми.
Како одговор на студентскиот состанок во Крагуевац, студентите од Ниш поднесоа предлог за формирање преодна влада составена од непартиски личности и која би се формирала на таков начин што ќе следат избори (на кои министрите од преодната влада нема да учествуваат).
Таквиот предлог беше поддржан од мнозинството студенти во блокада. Сепак, со формирањето на нова, Влада под водство на новиот премиер Ѓуро Мацут, кој го наследи Милош Вучевиќ, таквата идеја набрзо исчезна од фокусот на јавноста, а барањето за распишување вонредни парламентарни избори доби на сила, наведуваат српски медиуми, пренесе МИА.
