Студентите кои се во блокада денеска поднесоа кривична пријава до Првото основно јавно обвинителство во Белград против претседателот на Србија Александар Вучиќ, обвинувајќи го дека „поради рејтинг“ ги посетил повредените од пожарот во дискотеката во Кочани, во Клиничкиот центар на Србија.
„Не сакаме политички конфликти, не бараме одмазда, туку одговорност“, порачаа студентите пред зградата на обвинителството, пренесува Бета.
Претставник на студентите, кој не се претстави, во прочитано обраќање истакна дека Вучиќ влегол во болницата без заштитна маска и ракавици, во придружба на поединечни медиуми, додека пред него лежеле пациенти во болки.
– Тоа не беше само арогантен гест, туку и понижување на здравствениот систем и на повредените луѓе. Изгорената кожа не е рекламна табла. Правда за нив е правда за сите, изјави студентот.
Студентите му порачаа на обвинителството дека не молат, туку бараат да постапува согласно законот, а не од страв.
На студентите им се приклучи и Здружението на здравствени работници, кои на голем транспарент истакнаа парола „Здрав систем, здрави луѓе“, додека студентите носеа транспарент со цитат од законикот на цар Душан дека судиите се должни да постапуваат според законот, а не од страв од власта.
Групата студенти од Правниот факултет, кои го носеа транспарентот додека маршираа до обвинителството, им се придружи и група студенти што тргнаа од Медицинскиот факултет.
Собраните пред обвинителството во 11:52 часот одржаа и акција „16 минути тишина“ во спомен на 16-те загинати при уривањето на реконструираната кровна конструкција на Железничката станица во Нови Сад.
Извор: МИА
