Денешното рочиште за судскиот предмет на СЈО „Талир“ е повторно одложено. Овој пат за 16 мај, односно по одржувањето на претседателските избори.
Причината за денешното одложување е отсуството на овластените претставници на ВМРО-ДПМНЕ, Игор Јанушев и Наум Стоилковски. Одбраната на партијата тврди дека поради претседателската кампања и обврските околу неа претставниците на партијата не може да присуствуваат на ова рочиште. За обвинителката од СЈО Ленче Ристоска ова е уште еден обид на обвинителите да го одолговлекуваат судењето.
Претседателот на судечкиот совет судијата Османи Шабани го одложи судењето и јавно ја опомена партијата ВМРО-ДПМНЕ.
Во случајот „Талир“ обвинети се поранешниот премиер Никола Груевски кој е во бегство во Унгарија, поранешниот генерален секретар на Владата Кирил Божиновски и поранешниот министер за транспорот и врски Миле Јанакиески кои се товарат за „злоупотреба на службената положба и овластувања“ и „перење пари“, како и пратеникот Илија Димовски и неговиот сопартиец Леко Ристоски кои се обвинети само за делото „перење пари“. За истото дело, како правен субјект со обвинението опфатена е и ВМРО-ДПМНЕ.
На Елизабета Чингаровска нема да ѝ се суди бидејќи таа се спогоди со СЈО, призна вина и доби условна казна затвор од две години, која нема да се изврши ако во наредните пет години не направи друго кривично дело.
М. И.
