Во рамки на сесијата што се одржува неделава во Стразбур, Европскиот парламент со убедливо мнозинство ја одби иницијативата за изгласување недоверба на Европската комисија, поднесена од романскиот европратеник Георге Пипереа.
Предлогот доби поддршка од 175 пратеници, додека 360 гласаа против, а 18 беа воздржани. За иницијативата да биде прифатена, беше потребна двотретинска поддршка од пратениците што учествуваа во гласањето, при што вкупниот број гласови требаше да надмине половина од сите членови на Парламентот.
Пипереа, кој ја поднесе иницијативата, во понеделникот на пленарна дебата ја обвини Комисијата за нетранспарентност, непочитување на судскиот систем, избегнување дебати и игнорирање на позициите на Европскиот парламент. Според него, во изминатите шест години Комисијата ги концентрирала моќта и одлуките во рацете на претседателката Урсула фон дер Лајен, поткопувајќи ги демократските механизми на рамнотежа и контрола.
Тој истакна дека политиките на Комисијата довеле до уништување на мали бизниси, загрозување на суверенитетот на државите-членки, распарчување на заедничкиот пазар и зголемена нееднаквост меѓу земјите членки. Дополнително, според Пипереа, сиромаштијата и опаѓањето на квалитетот на образованието станале широко распространети.
Во своето обраќање за време на дебатата, фон дер Лајен ги отфрли обвинувањата, оценувајќи ја иницијативата како обид за внесување поделби и дестабилизација на демократските сили во ЕУ. Таа подвлече дека Комисијата останува посветена на соработка со сите проевропски и продемократски парламентарци, посочувајќи дека компромисот е суштински за функционирањето на демократијата.
– Денес сме сведоци на нова етапа во која демократијата се соочува со закани од нелиберални движења. Екстремистички сили се обидуваат да ги поларизираат нашите општества преку дезинформации, често со поддршка од надворешни актери, како Русија, изјави фон дер Лајен.
Иако не беше присутна на денешното гласање поради учество на Конференцијата за поддршка на Украина во Рим, нејзината политичка позиција доби засилување преку договор постигнат со Социјалистите и Демократите (СД). Според договорот, околу 150 милијарди евра од следната долгорочна буџетска рамка на ЕУ ќе бидат насочени кон стручно образование и социјални програми.
Овој компромис беше клучен, бидејќи СД најавија дека во спротивно ќе се воздржат од гласање, што иако немаше да го смени исходот, ќе оставеше впечаток на ослабена поддршка за фон дер Лајен и нејзината Комисија.
A.M.
