Новинарот Зоран Иванов, на дебатата по завршувањето на првиот круг од претседателските избори, која ја организираше ЦИВИЛ – Центар за слобода, во однос за тоа како помина првиот круг од претседателските избори, вели дека и покрај некои инциденти, до некаде е стигнат тој степен за мирни и чисти избори, како што е и впрочем услов за влез во Европската унија.
Иванов претпоставува дека во однос на оценката за изборите, и на ОБСЕ и ОДИХР, ќе биде позитивна и дека навистина заслужуваме европска визит карта.
„Немавме чувство дека со списоци се вадат луѓе, уцени за вработувања, тоа е едната димензија. Втората димензија самото место, партиите водеа кампањи и партиите си ги одмеруваа своите рејтинзи, особено тоа го правеа Алијансата на Албанците, Беса и ВМРО-ДПМНЕ. На СДСМ тоа не му беше толку потребно, дури сакаше да покаже дека со крупна албанска партија, моќна, влијателна политички, дека можат да излезат со заеднички кандидат, но и тој заеднички кандидат беше изнуден. Ако добро се сеќавам, Али Ахмети прво се обрати до своите колеги и лидери на другите албански партии, па тие го откачија за заеднички кандидат, па се заврте после кон својот владин коалициски партнер и го измислија тој термин „консензуален кандидат“. Иако имам чувство дека ДУИ не направи доволно во првиот круг кампања, за да излезат тој дел од албанскиот електрорат на гласање, односно неговите гласачи“, вели Иванов.
Иванов додава дека резултатите зборуваат дека тоа е еден крупен чекор напред за ВМРО-ДПМНЕ и за нивниот нов претседател, Христијан Мицкоски, кој како што вели тој, доколку има добар спор ќе биде и лидер на партијата, а не само претседател.
„Како и да ја завртиме работава е голем шамар за СДСМ, ДУИ и за заедничкиот кандидат. Таа мала разлика се очекуваше, но ако се точни резултатите досега и ако таа се сведе и на некакво благо водство, на Силјановска, тоа знам дека на крај на 5 мај нема да биде така бидејќи нејзината кампања и нејзината политичка филозофија е заглавена меѓу кориците на учебниците по право на Правниот факултет и на тој кабинет. Ова е политичка функција, да не испадне дека ја користам реториката на нејзиниот против-кандидат во кампањата“, додава Иванов.
Иванов смета дека со оваа излезност и со овој резултат што го освои Гордана Силјановска Давкова, односно ВМРО-ДПМНЕ, дека ќе имаат мотив уште повеќе да агитираат што повеќе луѓе да излезат на избори, за да предизвикаат парламентарни избори.
„Тука ќе го гледаат поразот на СДСМ и мислам дека тука ќе се води кампањата во двата круга, само да почекаме со резултатите, како и да е, тие се високи за Силјановска, малку неочекувано и ова е пристојна шлаканица за СДСМ и консензуалниот кандидат. Не е до кандидатот, туку е до партиите. Направија мал милион глупости, заборавија дека дојдоа на власт, не со помош на партиските членови, не само со помош на симпатизерите, туку со едно движење кое е подолг период се вложи себе“, додава Иванов.
Ангела Петровска
камера: Атанас Петровски
монтажа: Биљана Јордановска
фотографијa: Џабир Дерала
