Претседателот на Македонскиот полициски синдикат (МПС) д-р Марјан Кицев денеска побара припадниците на Министерството за внатрешни работи, Агенцијата за разузнавање, Агенцијата за национална безбедност и Управата за финасиска полиција, да бидат вакцинирани против ковид-19, во првиот или најдоцна вториот круг.
Тој писмото со ова барање го испратил до Владата, односно до премиерот Зоран Заев,министерот за здравство Венко Филипче, министерот за внатрешни работи Оливер Спасовски, Директорот на Агенцијата за разузнавање, Еролд Муслиу, Директорот на Агенцијата за национална безбедност, Виктор Димовски и до Директорот на Управата за финансиска полиција, Арафат Муареми.
Нагласувајќи дека МПС е „единствен репрезентативен синдикат во Министерството за внатрешни работи, Агенцијата за национална безбедност, Управата за финансиска полиција и Агенцијата за разузнавање на Република Северна Македонија, со околу 8.500 членови“, Кицев бара „вработените во Агенцијата за разузнавање (АР) , Министерството за внатрешни работи (МВР), Агенцијата за национална безбедност (АНБ) и Управата за финансиска полиција (УПФ), Владата да ги планира во приоритетениот план за вакцинација како лица изложени на највисок ризик, односно нивната имунизација да биде планирана во првата или најдоцна во втората фаза на имунизација.
„Вработените во безбедносните служби како вработени во едни од највиталните институции кои во изминатиот период ја покажаа својата пожртвуваност, посветеност и несебичност во справувањето со пандемијата, изложувајќи се себе, но и изложувајќи ги и нивните семејства од зараза на COVID-19“, нагласува претседателот на МПС.
