Голем дел од заедничката прес-конференција на крајот од разговорите помеѓу унгарскиот премиер Виктор Орбан, кој е во дводневна официјална посета на Македонија со делегација од десетина министри, и неговиот домаќин премиерот Христијан Мицкоски, помина со изјави и прашања за евроинтегративниот процес и раздвојувањето на Македонија и Албанија на европскиот пат.
Унгарија, како претседавач со Европската Унија, е подготвена да помогне во спорот со Бугарија и да посредува меѓу двете држави. Тешко е да се разбере зошто Албанија е издвоена. Тешко е тоа да го разбере една нација. Сакам да нагласам дека националната гордост е најважна за една нација, а одлуката на ЕУ претставува токму повреда на националната гордост во Северна Македонија. Ова е огромна грешка од страна на ЕУ, што би ја карактеризирал како историска и сега може да се стави на квадрат, бидејќи Северна Македонија ќе биде ставена зад Алабанија, за што не гледам никакви причини, Вие до крајот на годинава мора да ги отворите преговорите со ЕУ – истакна високиот гостин од Унгарија на прес-конференцијата.
Се чини дека Орбан го кажа токму тоа што сакаше да го слушне неговиот домаќин, особено ако се земе предвид дека и Унгарија го поддржа одвојувањето на Албанија и Македонија, а и во досегашниот тек на претпристапните преговори, можеше и порано да се заложи да помогне да се реши спорот со Бугарија, особено што Унгарија го имаше и еврокомесарот за проширување.
Познат како кочничар на многу одлуки на ЕУ, особено оние што се однесуваат на Русија и Украина, можеше да стави вето и на некои од одлуките на комисиите на ЕУ кои, како што сега вели, биле на штета на нашата земја.
На таа релација е и реакцијата на опозициската СДСМ на денешната средба меѓу Мицкоски и Орбан, за која велат дека не носи ништо ново ниту надежно за македонските граѓани, и го потсетија премиерот дека посетата требаше да ја искористи и јавно да го праша Орбан, зошто амбасадорот на Унгарија, инаку земја претседавач на ЕУ, гласал за одвојување на Македонија и Албанија.
Ова требаше да го праша Мицкоски. Зошто македонските граѓани, во неговото претседавање се доведени во ситуација да бидат последни во редот за приклучување во ЕУ? Ако тоа воопшто некогаш се случи, велат од СДСМ.
Од најголемата опозициска партија додааваат дека Мицкоски требаше да го праша Орбан зошто не помогна, како стратешки партнер, во периодот кога договарале кредити од сомнително, кинеско потекло, да се промени преговарачката рамка, како што ветуваше премиерот.
Според СДСМ, Мицкоски и Орбан не понудија ништо за граѓаните, освен што одлучија да ги задолжат за нови 500 милиони евра и да ја закопаат европската перспектива на државата.
Д. Мишев
