САД ќе продолжат да и помагаат на Украина без оглед на резултатите од претстојните избори во САД, изјави денеска во Загреб претседателката на американскиот Претставнички дом Ненси Пелоси. На 8 ноември Американците излегуваат на гласање за Конгресот, што би можело да го промени односот на силите во Претставничкиот дом и Сенатот. Доколку републиканците ја преземат контролата, аналитичарите оценуваат дека Вашингтон може да ја запре или намали помошта за Украина.
Нашата поддршка нема да престане, истакна Пелоси на прес-конференцијата со хрватскиот премиер Андреј Пленковиќ.
Таа додаде дека Киев ја има поддршката од двете партии и од двата дома на Конгресот и дека оваа поддршка започнува од Белата куќа. Пелоси наглеси дека американската поддршка за Украина не е „бланко чек“, бидејќи таа земја покажала интегритет и транспарентност во примањето помош.
Ова е однос со голем интегритет, за демократија и слобода во светот, изјави претседателката на американскиот Претставнички дом.
Зборувајќи за беспилотните летала што Иран и ги испорачува на Русија, Пелоси истакна дека Техеран прави голема грешка и дека односот меѓу Русија и Иран е порака до оние земји кои се воздржуваат од гласање во глобалните тела и ги осудуваат постапките на Москва „да размислат повторно“.
Таа нагласи дека Украина постигнува „одредени успеси“ против беспилотните летала.
Тоа е опасна технологија која мора да се запре, рече Пелоси.
