Русија стана првата земја што формално го призна владеењето на Талибанците, а министерот за надворешни работи на Авганистан, Амир Кан Мутаки, го нарече тоа „храбра“ одлука, пишува Би-Би-Си.
Тој се сретна со рускиот амбасадор во Авганистан, Дмитриј Жирнов, во Кабул во четврток, каде што г-дин Жирнов официјално му ја пренесе одлуката на неговата влада да го признае Исламскиот емират Авганистан.
Мутаки рече дека тоа е „нова фаза на позитивни односи, меѓусебно почитување и конструктивен ангажман“ и дека промената ќе послужи како „пример“ за другите земји.
Талибанците бараат меѓународно признание и инвестиции откако се вратија на власт во август 2021 година, и покрај извештаите за зголемено кршење на човековите права, пишува Би-Би-Си.
„Веруваме дека чинот на официјално признавање на владата на Исламскиот емират Авганистан ќе даде поттик за развој на продуктивна билатерална соработка меѓу нашите земји“, се вели во соопштението на руското Министерство за надворешни работи.
Се вели дека Русија го гледа потенцијалот за „трговска и економска“ соработка во „енергијата, транспортот, земјоделството и инфраструктурата“ и дека ќе продолжи да му помага на Кабул во борбата против заканите од тероризам и трговија со дрога.
Д. Т.
