Комисијата за жалби при Советот на етика во медиумите на Македонија (СЕММ) на седница одржана на 10 септември 2019 година, врз основа на примена жалба од „Друштво МХЕ Тополки“ за прилогот на „Алсат-М“ насловен „Службеници кои се посомневале за „Тополки“ на Анѓушеви завршиле зад решетки“ донесе одлука дека е прекршен Кодексот на новинарите на Македонија во членот 1.
Според жалителот и во самиот наслов на прилогот и во дел од содржината, „Алсат-М“ директно инсинуирал за поврзаност на двата случаи, повикувајќи се на документ кој што не бил јавно прикажан.
„Комисијата, најнапред, утврди дека прилогот произлегува од јавниот интерес и дека станува збор за серијал текстови, кои ја следат постапката за закуп на државно градежно земјиште од страна на приватна компанија, чиј управител е во роднинска врска со висок владин функционер. Комисијата се согласи дека и активностите на семејствата на носителите на јавни функции и евентуалниот конфликт на интереси, треба да подлежат на строг јавен надзор, а дека во исто време, приватните компании, како и јавните институции, не смеат да бидат изземени од теми за кои јавноста има право да биде информирана.
Во овој контекст новинарот може да објави нешто за кое што нема доволно докази, а за кое има основано сомнение. Основано сомнение подразбира презентирање аргументи, кои се разумни и кои се индикатор дека нешто е вистина, без да имаме конкретен доказ за вистинитоста.
Комисијата заклучи дека прилогот на Алсат-М во најголем дел е професионален и етички, но дека сепак авторот отстапил од основното новинарско правило, да побара став од сите засегнати страни, во случајов, и од фирмата „МХЕ Тополки“. Со тоа, медиумот ќе обезбедел целосна и уште пообјективна информација, наместо да смета дека е доволно да се обрати само до Владата, која е само една од страните во новинарскиот производ“, стои во одлуката на Советот на етика во медиумите на Македонија.
