Северна Македонија кон крајот на минатата година како НАТО-членка започна и со свои сили да придонесува кон мисијата на Алијансата во Косово. Нашата заедничка мисија и тука е целта која што ја споделуваме и со Владата на Република Косово е да обезбедиме безбедност и стабилност на целиот регион, безбедност и стабилност на Косово, да имаме навистина регион којшто ќе цели кон заедничка европска и евроатлантска иднина. Тоа е иднината која што ја посакувавме и за нашите граѓани и тоа е иднината која што граѓаните во нашиот регион целосно ја заслужуваат, изјави денеска министерката за одбрана Радмила Шекеринска по средбата со министерот за одбрана на Република Косово, Арменд Мехај.
Како земја контрибутор во стабилноста на Косово, нашиот интерес е најмладата држава на Балканот да се развива според демократските стандарди и да го заземе своето место на партнер и сосед меѓу земјите во регионот, напиша министерката на својот Фејсбук профил.
Северна Македонија го поддржа и го поддржува дијалогот Приштина – Белград во насока на постигнување договор со кој ќе се гарантира мирот, стабилноста, безбедноста и напредокот, не само на двете земји, туку и на регионот во целина. рече Шекеринска.
Министерката Шекеринска се осврна и на соработката во областа на военото образование,каде на Воената академија од 2012 година се запишаа осум генерации на питомци, од кои пет генерации веќе го завршија школувањето. Тоа беше гест на пријателство, но и гест на доверба кон нас . Во моментов на Академијата се школуваат четворица косовски питомци, од кои три млади девојки амбициозни, рече Шекеринска. Шекеринска нагласи дека се додаваат дополнителни елементи во билатерална соработка меѓу двете земји.
Со потпишуање на Меморандумот за разбирање се создава поблиска и поцврста соработка во доменот на битката против лажните вести и дезинформациите. Ако во минатото единствениот непријател беше воена сила, сега дезинформациите можат да го загрозат здравјето, може да ја загрозат безбедноста, може да го загрозат регионот. И затоа навистина очекувам дека со овој Меморандум за разбирање и соработка во борбата против лажни вести и дезинформации, како и развојот на односите со јавност ќе покажеме и добра регионална соработка, но и ќе си помогнеме на двете држави, потенцира Шекеринска.
Министерката Шекеринска информира дека веќе две години сме и во врвот на активната транспарентност во државата, а Министерството е најтранспарентната институција. Во истражувањата на „Транспаренси интернешнл“ бевме рангирани на второ место во целата Централна и Источна Европа, далеку подобри од некои претходни земји членки на НАТО.
Со овој Меморандум ќе имаме специјално развиени курсеви за односи со јавноста и справување со дезинформации коишто нема да ги користиме само ние, туку ќе бидат и за потребите на МО на Република Косово и тие ќе ги креира нашиот НАТО-Центар, Регионалниот центар за односи со јавност и еден од нив ќе биде реализиран тука во Скопје, а еден дел ќе биде реализиран во Косово, рече Шекеринска. Додаде дека логично е две соседни земји да си помагаат и да се поддржуваат и додаде оти овој Меморандум е само еден чекор во развивање на побогата одбранбена соработка.
Шекеринска изрази надеж дека на почетокот на септември ќе има заедничка седница на двете влади и дека, како што рече, ќе ја испратиме пораката дека нашиот регион научил од своите грешки во минатото и дека со многу амбициозност, отворен, модерен, пријателски дух гледа кон нашите заеднички предизвици на целосна интеграција кон европските и евроатлантските институции.
