Во Брисел денеска се одржува состанок на Советот НАТО-Русија. Русија на првиот состанок на Советот во последните две години ја претставуваат заменик министерот за надворешни работи Александар Грушко и заменик министерот за одбрана Александар Фомин.
Денешниот состанок е втор од трите клучни ангажмани со Русија, наменети за смирување на растечката закана што ја претставува Москва за соседна Украина, додека земјата распоредува илјадници војници долж границата. Во понеделникот претставниците на Русија и САД во Женева преговараа повеќе од седум часа, потсетува Си-Ен-Ен. Тие разговараа за безбедносните гаранции меѓу Русија и САД, а делегациите ги предводеа заменик-државната секретарка на САД Венди Шерман и рускиот заменик министер за надворешни работи Сергеј Рјабков.
Денешниот состанок на Советот НАТО-Русија е навремена можност за дијалог во критичен момент за европската безбедност, напиша на Твитер генералниот секретар на НАТО Јенс Столтенберг.
– Кога тензиите се високи, уште поважно е да седнеме околу иста маса и да разговараме за нашите грижи, додаде Столтенберг.
За утре е закажан состанок на Советот Русија-ОБСЕ во Виена./ МИА
