Доналд Трамп изјави дека неговиот митинг во Њујорк во неделата бил „апсолутен љубовен фестивал“, игнорирајќи ги двопартиските повици дека тој лично ќе се извини откако шегата на комичарот на настанот предизвика широко распространета навреда.
Републиканскиот кандидат за Белата куќа рече дека е „чест да се биде вклучен“ на митингот во Медисон Сквер Гарден, иако се огради од стенд-ап комичарот кој го опиша Порторико „остров на ѓубре“. Анкетите покажуваат дека Трамп и неговата демократска ривалка, американската заменик-претседателка Камала Харис, се „држат за врат“ на само една недела до изборите на 5 ноември. И двајцата се обидуваат да ги придобијат гласачите Латиноамериканци во свинг државата Пенсилванија, дом на повеќе од 470.000 Порториканци.
Во вторникот вечерта, Трамп водеше кампања во градот Алентаун, Пенсилванија, кој претежно со ЛатиноАмериканци. Некои членови на порториканската дијаспора во САД изразија бес поради изјавите на Тони Хинчлиф. Голем број истакнати Порториканци – вклучително и сојузниците на Трамп – го повикаа републиканскиот кандидат јавно да ја отфрли шегата.
Меѓу нив беше Анхел Синтрон, претседател на Републиканската партија на Порторико, кој беше цитиран од новинската агенција Асошиејтед прес дека е „срамно, неуко и целосно за осуда“.
Во интервју за ABC News во вторникот, Трамп се огради од Хинчклиф. „Не го познавам, некој го стави таму. Не знам кој е“, рече тој.
Говорејќи од неговото одморалиште во Мар-а-Лаго, Флорида, Трамп инсистираше на тоа дека митингот бил „апсолутен љубовен фестивал“.
„Љубовта во таа соба беше воодушевувачка“, додаде тој.
Сојузниците на Трамп, пак, им возвратија на демократите, обвинувајќи го актерот Џорџ Лопез дека правел бесчувствителна шега на сметка на Мексиканците додека зборувал на митингот на Камала Харис во Аризона за време на викендот.
извор: Би-би-си
