Веќе 20 години МИА е веродостоен и професионален јавен информативен сервис. Дали според Вас МИА ја оправдува довербата кај јавноста и во медиумскиот простор?
Секако, довербата ја оправдува, но ја гради и понатаму, преку понуда на широк спектар содржини и сервиси. Добро е што публиката чувствува дека агенцијата настојува и понатаму да се развива, бидејќи само така ќе ги исполнува потребите на јавноста на вистинскиот начин.
Во еден период од постоењето на МИА бевте дел од новинарската екипа на Агенцијата. Со какви предизвици се соочуваше МИА во текот на нејзиното „растење“?
Почнавме како мал, но посветен тим, кој оттаму го црпеше и градеше својот ентузијазам. Се разбира, учевме низ работата, ја учевме потребата од брзина и квалитет, секоја минута за нас претставуваше некаков рок. Знаевме дека мораме да се приспособиме на динамиката што ја бара една новинска агенција, за тоа учевме од поискусните колеги од регионот и пошироко. Моравме да учиме и дека вистинското агенциско новинарство подразбира дека секогаш мора да се биде на страната на неутралноста и професионалноста, да се „исцрта“ линијата до каде може да се оди, без да се компромитира она што го создававме – веста, односно содржината што и’ се пласираше на јавноста. Предизвик беше да се инвестира во знаењето, во опременоста, во условите за работа, во поврзувањето со крајните корисници…
Сметате ли дека рејтингот на МИА се движи во нагорна линија и дали сте задоволни од содржините кои ги нуди?
Агенцијата работи се’ подобро, успешно се носи со техничко-технолошкиот развој, таа е дежурен хроничар на случувањата на домашен и меѓународен терен… Кога ќе забележите дека содржините се креираат на начин што им излегуваат во пресрет на трендовите што постојано се менуваат, и тоа во „real time“, со цел да се стигне до што е можно повеќе корисници, тогаш добрите оценки и заслугите доаѓаат сами по себе.
Како ја оценувате досегашната соработка со МИА?
Како нешто што постојано се развива, а секогаш има простор заеднички да се вложува во професионалното и доследно новинарство, во градењето и заштитата на професионалниот интегритет.
Со каква порака би и’ го честитале јубилејот на МИА?
Инспирирајте со иновативни продукти. Слушајте го гласот на јавноста, таа има право да знае, а придобивките од слободните медиуми им припаѓаат на сите. Успехот е „игра“ што постојано се учи.
Габриела Точко
