Украинскиот претседател Володимир Зеленски ја критикуваше неутралноста што ја покажа Израел по руската инвазија на неговата земја, што, според него, резултираше со „сојуз“ меѓу Москва и Техеран, манифестиран преку испорака на ирански беспилотни летала за руската армија.
Таков сојуз едноставно немаше да постои доколку вашите политичари ја донесоа вистинската одлука во тоа време. И ние го баравме тоа, им рече Зеленски на новинарите на конференцијата организирана од израелскиот весник Хаарец.
Тој смета дека ваквото зближување меѓу Москва и Техеран е овозможено со „израелската одлука да не се конфронтира со Кремљ“ во 2014 година по руската анексија на Крим. Зеленски верува дека целта на ваквата одлука е да се зачуваат добрите односи меѓу двете земји.
Украинскиот претседател ова го изјави неколку дена пред парламентарните избори во Израел со неизвесен исход, кои се закажани за 1 ноември.
Претходно во понеделникот израелскиот министер за одбрана Бени Ганц разговараше со својот украински колега Олексеј Резников и рече дека Израел нема да испорачува оружје на Украина. Тоа се случи два дена откако Москва го предупреди Израел дека не треба да го испорачува своето оружје на Киев.
