„Денеска примат се стави на три цели, првата е политичката одлука во делот на промените во извршната власт. Денеска имавме дебата во поглед на актуелните случувања во Република Северна Македонија, во делот на меѓународните политики, но и во делот на домашните политики. Од тука, излезе заклучок кој што Централниот Одбор го изгласа вечерва и тоа го задолжи претседателот на Социјалдемократскиот Сојуз, кој што е истовремено и Премиер на Владата на Република Северна Македонија, т.е. јас, да продолжам со процесот или отворената реконструкција на владата, односно да не носиме одлука за предвремени парламентарни избори, да не одиме во постапка на враќање на мандатот, туку да продолжиме со она што беше првично замислено, а тоа е реконструкција на владата“, изјави премиерот Заев.
Покрај овие одлуки на вчерашниот Централен одбор на партијата беше избран и новиот Извршен одбор кој ќе раководи со партиската структура. Претседателот на СДСМ, Зоран Заев искатка дека во наредниот период ќе има уште една седница на Централниот одбор на која ќе бидат назначени новите потпретседатели.
„Избравме 16 членови на Извршниот одбор, од кои девет жени. Сакавме да испратиме порака на користењето на еднаквиот капацитет на жените и мажите, вградени и во политичкиот и во општествениот систем во земјата. Верувам дека пораката ќе стигне и до многу државни, општински институции, но и политички партии“, рече Заев.
Новиот Извршен одбор на СДСМ ќе го сочинуваат: Фросина Ременски, Благојче Бочварски, Рената Десковска, Костадин Костадинов, Есрас Алихи, Ѓоко Танасоски, Весна Ѓершан, Васко Талевски, Тања Стојановска-Иванова, Драган Тевдовски, Љатифа Шиковска, Стефан Богоев, Кети Василевска, Нина Велкова, Петре Шилегов и Маринела Ојлеска.
Според тоа што може да се види на официјалната страна на СДСМ, од досегашниот состав се поклопуваат неколку имиња, односно во извршниот одбор остануваат Благојче Бочварски, Драган Тевдовски, Есрас Алихи, Ѓоко Танасоски, Кети Василевска, Нина Велкова, Фросина Ременски, Рената Десковска,Петре Шилегов и Стефан Богоев додека нови имиња се Костадин Костадинов, Весна Ѓершан, Васко Талевски, Тања Стојановска-Иванова, Љатифа Шиковска и Маринела Олејска.
Извршниот одбор на СДСМ од 24 е намален на 16 членови, а од претходната постава во новиот состав ги нема Аднан Џаферовски, Александар Кирацовски, Дамјан Манчевски, Дијана Ќурчиска, Љупчo Николовски, Маја Миленковиќ, Максим Димитриевски, Мухамед Зекири, Оливер Спасовски, Петар Атанасов, Радмила Шекеринска, Тања Ковачев и Хари Локвенец.
М. И.
