Портпаролот на Кремљ, Дмитриј Песков, уште еднаш во главна улога во руската пропагандната програма која сериски се пренесува во дел од македонските медиуми.
Последните „срцепарателни“ изјави на Песков за „невозвратената братска љубов“ од Србија, и нејзиниот претседател А. Вучиќ, кој се дрзнал да помисли да продава оружје по Европа, наиде на одличен прием кај домашните љубители на руски сказки.
Во дел од македонските медиуми кои редовно ги пренесуваат „бисерите“ на руските функционери и пропагандисти, повторно му беше отстапен простор на портпаролот на државата агресор, на кого не му се допаднало некој друг, во случајот братската Србија и нејзиниот претседател, да продава оружје, и тоа на клиенти без „амин“ на Кремљ. Според некритичкиот пренос на изјавата, се чини дека истото им засметало и на одредени македонски медиуми, кој со речиси идентичен текст, и наслови кои се разликуваат само во мали нијанси пренесуваат: Песков: Не сакаме муниција и оружје од братска Србија да бидат употребени против нас; Кремљ: Не сакаме оружјето произведено во братска Србија да се користи против нашите војници; Вучиќ сака да продава мунициј на Европа, реагира Кремљ: Не сакаме оружјето од братска Србија да биде употребени против нас, а некои одат и до таму што се ставаат во улога на извршители на Песков, за да го искараат српскиот претседател: ПЕСКОВ ГО ИСКАРА ВУЧИЌ ЗА МУНИЦИЈАТА Последно нешто што сака Москва се српски куршуми на фронтот.
Иако македонските медиуми не го наведуваат изворот на веста, по пребарувањео на интернет, според насловите, може да се забележи дека овие написи, традиционално доаѓаат од соседна Србија, каде за разлика од тука, не го кријат изворот, па српските медиуми како извор од каде ја преземале веста ги наведуваат руските прорежимски медиуми РИА Новости и Комерсант.
Но, како и Песков, и тие ја заобиколуваат другата страна на приказната, и никаде не спомнуваат дека истиот тој Кремљ, чиј портпарол е Песков, никого не прашува и на никого не му полага сметка кога купува оружје и муниција од Иран, Северна Кореа, и истото го употребува против до вчера братската Украина, убивајќи цивили, жени, деца…како и кога продава оружје на диктаторски режими, како оној на сирискиот крвник Башар ал Асад или на африканските господари на војната.
И додека во продолжение пренесуваат како Песков додал дека Русија разбира дека Белград е под невиден притисок и дека ситуацијата таму не е лесна, и Москва разбира со какви проблеми се соочуваат Србите, истовремено потсетуваат дека претходно, во мај годинава, Русија веќе еднаш доживеала „длабока болка“ поради тоа што Србија, како што тврдат, го снабдувала Кијив со оружје. По тие обвинувања, Вучиќ најави дека ќе го суспендира извозот на муниција. Можеби целта на овие написи објавени во медиумите од блиското соседство на Вучиќ, е да го наведат српскиот претседател на ист таков потег, се во корист на интересите на Москва, а со самото тоа и на домашните спроведувачи на руската пропаганда и агендата на руските хибридни операции во земјава и во регионот на Западен Балкан.
Ова особено ако се има предвид извештајот на ЕУ во кој се нотира дека „Северна Македонија останува предмет на непријателски операции на странско влијание, вклучително и напори за поделба на општественото ткиво на земјата и искористување на антиевропските чувства, особено преку таблоидите и медиумите на српски јазик, кои функционираат како регионални засилувачи на наративите на Кремљ и уживаат значително влијание“, од каде недвосмислено произлегува оската Скопје-Белград-Будимпешта-Москва.
Впрочем, Тимот за мониторинг на хибридни закани на ЦИВИЛ, низ серијата извештаи за рано предупредување за хибридна војна на ЦИВИЛ, продуцирани во рамките на проектот „Демократски навигатор“, веќе предупреди на стратешката ранливост на Северна Македонија од руските хибридни операции и даде препораки за зајакнување на институционалната и граѓанската отпорност на ваквите закани.
Драган Мишев, во соработка со Тимот на ЦИВИЛ за мониторинг на хибридните закани (ЦХТМ)
