Украина ќе претседава со Централноевропската иницијатива (ЦЕИ) во 2027 година, со приоритети насочени кон регионалната безбедност, енергетската стабилност, економската соработка, европската интеграција и зајакнувањето на отпорноста кон хибридните закани. Ова го најави украинскиот министер за надворешни работи, Андриј Сибиха, на 5 ноември во Букурешт, на церемонијата на преземање на претседавањето од Романија.
Украинскиот министер истакна дека неговата земја, и покрај континуираната руска агресија, располага со искуства и технологии што можат да придонесат за заедничката европска безбедност.
„Не дојдов тука да барам сочувство, туку соработка и партнерство“, порача Сибиха.
Тој нагласи дека Украина е подготвена да ги сподели искуствата стекнати во војната со своите европски партнери.
Меѓу приоритетите на украинското претседавање се енергетската безбедност, развојот на регионалната инфраструктура, трговијата, обновата на Украина, сајбербезбедноста и спротивставувањето на дезинформациите.
Амбасадорката на Украина во Северна Македонија, Лариса Дир, во објава на платформата X, информираше за учеството на министерот Сибиха во активностите на Централноевропската иницијатива во Романија и ги истакна овие приоритети за 2027 година.
На 5 ноември Министерот А.Сибига учествуваше на состанокот на шефовите на МНР на членките на Централноевропската иницијатива во🇷🇴 и ги претстави 🇺🇦приоритети на претседавањето со Иницијативата во 2027.Меѓу нив: енергетска безбедност,инфраструктура,трговија,обнова,сајбербезбедност https://t.co/0hAWnpyXJQ
— Larysa Dir (@dir_larysa) November 6, 2026
Посебно внимание ќе биде посветено на зајакнувањето на регионалната соработка во услови на зголемени безбедносни предизвици, вклучувајќи ги руските напади врз украинската енергетска инфраструктура и заканите за стабилноста на европскиот континент.
Сибиха нагласи дека праведен и траен мир во Украина е предуслов за долгорочна стабилност на цела Европа. Меѓу дипломатските приоритети ги посочи и враќањето на украинските деца однесени во Русија, зајакнувањето на транспортните и трговските врски и обезбедувањето слободна пловидба во Црното Море.
Значење за Западен Балкан и Северна Македонија
Централноевропската иницијатива е регионален меѓувладин форум основан во 1989 година, во кој членува и Северна Македонија. Организацијата има 17 членки, меѓу кои Белорусија, чие учество е суспендирано од 2022 година.
Украинското претседавање во 2027 година може да отвори дополнителни можности за соработка со земјите од Западен Балкан, особено во областите на енергетската безбедност, инфраструктурата, дигиталната отпорност и заштитата од дезинформации.
Европската интеграција ќе биде една од централните теми на украинската агенда. Сибиха најави дека Украина ќе го искористи претседавањето за поттикнување на проширувањето на Европската Унија, нагласувајќи дека полноправното членство на Украина, Молдавија и земјите од Западен Балкан ќе ја зајакне Унијата.
Џ. Д.
