Од извештаите што политичките партии законски се обврзани да ги поднесат до Државната изборна комисија и други надлежни органи, пред повеќе од два месеци, беше обелоденето дека ВМРО-ДПМНЕ има незаконски долг од 400.000 евра за кампањата на својата претседателска кандидатка Гордана Силјаноска Давкова.
КАКО СЕ ФИНАНСИРАШЕ ИЗБОРНАТА КАМПАЊА НА ВМРО-ДПМНЕ?
Воедно, во јавноста стана познато и дека финансирањето на политичката кампања на ВМРО-ДПМНЕ открива и крајно проблематични односи меѓу партијата и функционери и бизнисмени што се осомничени во предмети на Специјалното јавно обвинителство, а кои сега се дел и од постапките што се водат во Основното јавно обвинителство. Дел од прашањата се однесуваат и на финансирањето на проблематичната кампања од фирми во сопственост на Јордан Камчев. Тоа воедно е индикација за поврзаност со аферата наречена „Рекет“, а за која повеќе аналитичари се изјаснија дека е корупциски скандал и упатуваат на одговорност токму на Камчев кој од домашен притвор вршел поткуп.
Аналитичарите, но и СДСМ, преку повеќе соопштенија, укажуваат на тоа дека долгот од 400.000 евра за кампањата на Сиљаноска е флагратно кршење на Изборниот законик. Тие повикуваат на одговорност од ВМРО-ДПМНЕ, односно од високи функционери на партијата, вклучувајќи го и потписникот на кампањата, партискиот генсек Игор Јанушев.
ДЕФОКУСИРАЊЕ, НАМЕСТО ОДГОВОРИ И ОДГОВОРНОСТ
Државната комисија за спречување на корупцијата поднесе Посебен извештај за утврдените состојби во финансирањето на изборната кампања, во кој се констатираат низа нерегуларности и „дупки“ во финансирањето на кампањите на ВМРО-ДПМНЕ. Собраниската Комисија за политички систем и односи меѓу заедниците имаше и седница на таа тема уште на 1 октомври годинава. Сепак, одговорност сѐ уште нема.
На споменатата седница на Комисијата за политички систем, пратениците на ВМРО-ДПМНЕ го направија вообичаениот циркус, претворајќи ја седницата во сесија за испрашување на првата антикорупционерка Билјана Ивановска, наместо да дадат одговор на поставените прашања. Впрочем, тоа е вообичаена практика на функционерите на ВМРО-ДПМНЕ и нивните пропагандисти во медиумите и на социјалните мрежи. Секогаш кога се соочени со непријатни факти за нивното криминално минато и подеднакво криминална сегашност, тие креваат врева и почнуваат со фантастични приказни за дефокусирање на расправата околу нивните неславни постапки.
И ВО 2011 ГОДИНА, ВМРО-ДПМНЕ ИЗЛЕЗЕ СО ИЗБОРНА „ДУПКА“ ОД ПРЕКУ ТРИ МИЛИОНИ ЕВРА
Ова не е прва „дупка“ во извештаите од изборните кампањи на ВМРО-ДПМНЕ. Дури и во годините на режимското владеење на Груевски и ВМРО-ДПМНЕ, Државниот завод за ревизија утврди дупка од над три милиони евра во нивниот финансиски извештај. Се разбира, никој не смееше ни да помисли да ги повика на одговорност тогаш, а медиумите уредно молчеа.
Фактот што јавноста знае „само“ за милионските „дупки“ во 2011 и за дупката од 400.000 евра оваа година, не значи дека тоа се единствените финансиски „гревови“ на оваа партија, чии највисоки функционери ги следи децениска сенка од сериозни скандали и криминални дејствија.
ПРАШАЊАТА СЕ НИЖАТ
Освен на овие прашања, ВМРО-ДПМНЕ и нејзиниот формален лидер Христијан Мицкоски, должат многу други одговори. Мицкоски сѐ уште не одговори на ниедно од непријатните прашања, а секојдневно се таложат нови, како оние за набавките на инсулинот. Хидроцентралите, судирот на интересите на секој чекор што го правел и го прави, сомнежите околу тајната комуникација и испораките поврзани со Груевски и со Гајсер, поврзаноста со погрешно наречениот случај „Рекет“, блокирањето на правосудните реформи, антизападната кампања, линковите со радикалната десница, финансирањето на ботовите, ноторната лага што му ја кажа на бугарскиот премиер Бојко Борисов за неговото образование и титули наводно стекнати во Германија и Италија…
Прашањата се поставени, одговорите мора да се дадат, одговорност мора да има. Барем така вели законот, тоа го налага етиката и тоа го бара јавноста.
Џабир Дерала
