Српскиот претседател Александар Вучиќ планирал денеска приватно да ги посети Јасеновац и Пакрац, но хрватските власти нема да му дозволат да влезе во земјата, пишува Јутарњи лист повикувајќи се на извори блиски до хрватската влада, јави дописникот на МИА од Белград.
Премиерката Ана Брнабиќ одлуката на хрватската Влада да му забрани на српскиот претседател приватна посета на поранешниот концентрационен логор од Втората светска војна Јасеновац, ја оцени како скандал од прва класа кој се случил во современата историја на односите меѓу Србија и Хрватска.
-Тоа е исто како да му забраните на претседателот на Израел да го посети Аушвиц. Тоа е антиевропска и антицивилизациска одлука и брутално газење на слободата на движење. Да не анализираме колку тоа кажува за непочитувањето на српските жртви, изјави Брнабиќ во гостувањето на ТВ Пинк.
Министерот за внатрешни работи, Александар Вулин, најави дека од денеска сите функционери на хрватската држава, сите носители на службени или дипломатски пасоши ќе треба посебно да ја најават и објаснат својата посета или минување низ Србија и ќе бидат ставени под посебен контролен режим.
Како што е најавено, Вучиќ за ова ќе зборува утре по консултациите во врска со новата влада, а министерот за надворешни работи, Никола Селаковиќ најави итна прес-конференција.
Како што пишува денеска Јутарњи лист, повикувајќи се на извори од хрватската влада, Вучиќ без официјална најава од хрватските власти и без координација со амбасадата сакал да ја премине границата од Босна и Херцеговина, односно нејзиниот ентитет Република Српска и околу 11 часот да пристигне во Јасеновац, а потоа околу 14 часот и во Пакрац.
Од хрватската влада неофицијално изјавиле дека Вучиќ не почитувал никаков протокол, дека сакал се да направи надвор од процедурите и правилата на дипломатските односи и дека „со своите ТВ екипи“ сакал да ја премине хрватската граница и таму „да прави што сака“.
Меѓутоа, според Јутарњи лист, властите во Загреб јасно му рекле „не“ и му порачале дека идејата за „српски свет“ во Хрватска нема да помине.
Министерството за надворешни работи на Србија, поради забраната на српскиот претседател Александар Вучиќ да го посети приватно Јасеновац, испрати нота до хрватската амбасада во Белград, која вршителот на должноста одби да ја прими, јави дописникот на МИА од Белград.
Ова го соопшти министерот за надворешни работи Никола Селаковиќ на вонредна прес-конференција.
Министерството за надворешни и европски работи на Хрватска, во образложението на забраната за приватната посета на српскиот претседател Александар Вучиќ на Јасеновац, соопшти дека Хрватска не била официјално информирана за можната посета, но и дека посетата на висок претставник на странска држава на Јасеновац не може да биде од приватен карактер.
-Ова е застрашувачка одлука на хрватската влада, а Владата на Србија ќе донесе одлука за контрамерките што ќе бидат воведени, кажа министерот Селаковиќ.
Потпретседателот на Владата на Србија и министер за рударство и енергетика, Зорана Михајловиќ ја откажа официјалната посета на Загреб поради забраната на Хрватска на српскиот претседател Александар Вучиќ приватно да го посети Јасеновац.
Како што се наведува во соопштението од кабинетот на вицепремиерката Михајловиќ, таа во вторник во Загреб требаше да се сретне со министерот за економија и одржлив развој на Хрватска, Давор Филиповиќ, каде главна тема на разговор требаше да бидат регионалната соработка и гасната интерконекција.
-Средбата беше организирана со цел да се разговара за тоа како да работиме на зголемување на енергетската безбедност на целиот регион преку конкретни проекти и соработка и заеднички да одговориме на предизвиците на 21 век. Наместо да покажеме почит кон сите жртви и да бараме начини да изградиме заедничка подобра иднина, како што тоа го прави Србија, со ваквите потези само се враќаме во минатото и го спречуваме подобрувањето на односите меѓу двете земји во областите каде што има реална потреба за соработка, се наведува во соопштението на Михајловиќ.
Претседателот на Србија, Александар Вучиќ, денеска на Инстаграм профилот „будучностсрбијеав“ објави фотографија од споменикот во Јасеновац со коментар „Само вие работите си ја својата работа. Српскиот народ ќе живее и никогаш нема да заборави“.
Споменикот Камен цвет е монументален споменик посветен на сите жртви кои беа убиени од усташите во логорот Јасеновац за време на Втората светска војна.
Како што соопшти на прес-конференцијата министерот за надворешни работи Никола Селаковиќ, во врска со оваа состојба Вучиќ утре ќе и се обрати на јавноста.