Преку формирање жив синџир, беше поставен светски рекорд за изведување на Националната химна на Украина, во рамки на глобалната иницијатива „The free world gathering“. На плоштадот „Македонија“ во Скопје денеска беше одбележан Денот на независноста на Украина. Странските амбасадори во земја со знамиња во рацете дадоа поддршка на Украина која точно пола година е во војна, откако беше нападната од Русија на 24 февруари.
Дел од програмата за одбележување на независноста на Украина беше и поставување светски рекорд за изведување на националната химна на Украина која се пееше истовремено во 50 земји во светот.
Одбележувањето на плоштадот „Македонија“ во Скопје го организираа Амбасадата на Украина во државава и Здружението на Украинци „Лесја Украинка“.
На одбележувањето поддршка за Украина дадоа и амбасадорите на Германија, Соединетите Американски Држави, Холандија и Шведска во Република Северна Македонија.
Првиот секретар во Украинската амбасада во Македонија, Руман Буга, порача дека војната во Украина промени се, како и за државата, така и за Европа и за светот.
„Да се потсетиме на патот по кој ние Украинците тргнавме и колку успеавме да промениме. Украинците докажаа дека се непобедливи. Им благодариме на сите кои ја покажаа својата сила во ова време, сите кои се бореа и се борат за Украина и им помогнаа на нашите војници. Благодарност и до сите наши пријатели ширум светот за помош и поддршка за Украина“, додаде тој.
Олександар Урбановиќ од Здружението „Лесја Украинка“ се заблагодари на Македонија за помошта, опишувајќи ја како „мала земја со лавовско срце“.
„Дадовте дури и повеќе од што можевте и никогаш нема да заборавиме. 24 Август за Украинците е најзначаен празник бидејќи независноста е токму тоа за што се бори денес Украина“, порача Урбановиќ.
Украина прогласи независност од СССР на 24 август 1991 година, а нејзината независност е финализирана на 25 декември истата година. Службен јазик во државата е украинскиот, а доминантна религија е православието.
