Пишува: Амб. ЛАРИСА ДИР
Вонредна и Ополномоштена Амбасадорка на Украина во Република Северна Македонија
На 4 април светот го одбележува Меѓународниот ден на едукација за минска опасност и помош во противминските активности. Целта на овој ден е да се подигне свеста за заканата што ја претставуваат експлозивните направи за здравјето и животот на луѓето.
„Мина е експлозивна направа насочена кон онеспособување или уништување на лице, возило или објект поради присуство, близина или контакт со лице или превозно средство. Според тактичката намена, мините се делат на: противпешадиски и противвозилски; според степенот на опасност – на деактивирачки и не-деактивирачки“. Приближно така започнуваат лекциите за граѓаните на Украина, особено за учениците, кои поради руската агресија против Украина, станаа задолжителен дел од наставниот процес.
Поради руската воена агресија, Украинците секојдневно мора да се сеќаваат на опасноста од мини. Потребно е да се знаат следниве 10 факти:
- Украина е една од најминираните земји во светот. Речиси 139.000 км² (околу 25% од територијата) се потенцијално контаминирани со руски мини и неексплодирани направи.
- Украинските деминери ги враќаат украинските земји во безбедна употреба. Од почетокот на руската инвазија се деминирани 35.000 км², од кои 17.000 км² во 2024 година.
- Во тек е големо истражување на украинските територии. Во 2025 година се планира да се истражат уште 31.000 км² за да се откријат и отстранат заканите.
- Планирано е приоритетно деминирање. Од февруари 2022 година, украинските деминери проверија над 309.000 хектари територии кои се критично важни за животот и економијата.
- Деактивирани се стотици илјади опасни објекти. Откриени и уништени се 565.320 експлозивни направи, вклучувајќи 3.931 авиобомби и речиси 3.000 кг експлозив.
- Русите намерно минираат критична инфраструктура на Украина. Рускиот окупатор поставува експлозиви на објекти за животна поддршка, енергетски структури и цивилна инфраструктура.
- Минираните земјоделски полиња ја загрозуваат прехранбената безбедност. Големи површини обработливо земјиште се минирани, што е опасно за фармерите и ја оштетува економијата.
- Под закана се милиони Украинци. Околу 6,1 милион луѓе во различни региони постојано се соочуваат со ризик од мини.
- Поради мини загинале 318 луѓе, меѓу нив 16 деца; над 760 се ранети, меѓу нив 86 деца.
- Деминирањето бара големи напори. Постојното темпо е недоволно, па Украина активно соработува со меѓународни партнери за да го забрза расчистувањето на териториите и да ги заштити луѓето.
Меѓународниот ден на едукација за минска опасност се одбележува по иницијатива на Генералното собрание на ОН од 2006 година. Жалосно е што оваа резолуција не ја разубеди државата-агресор Русија да не поставува противпешадиски мини и слични направи на суверена територија на Украина.
Денес, Украина активно спроведува хуманитарно деминирање и ги повикува другите држави да ѝ помогнат.
Го цениме учеството на партнерите во хуманитарното деминирање – тоа спасува животи и здравје на луѓето.
