Србија бележи позитивни резултати во макроекономската стабилност и фискалната дисциплина, но нема напредок во владеењето на правото и слободата на медиумите, а загриженост предизвикуваат и блиските односи со Русија, се оценува во Извештајот на Европскиот парламент за Србија.
Како што јави дописникот на МИА од Брисел, во документот усвоен денеска од страна на Комитетот за надворешни работи на ЕП (АФЕТ) со 55 гласа „за“, 13 „против“ и 8 „воздржани“, европратениците ја повикуваат Србија „сериозно да ја покаже“ својата стратешка ориентација кон ЕУ, а од Унијата бараат да го преиспита обемот на финансиската помош за земјата, доколку таа продолжи да ги поддржува антидемократските идеологии и не успее да се усогласи со санкциите на ЕУ и заедничката надворешна и безбедносна политика.
– Српските власти треба да покажат силна политичка волја и доследност во спроведувањето на реформите поврзани со ЕУ и недвосмислено да комуницираат со граѓаните за Унијата и за европскиот пат на Србија, се наведува во Извештајот.
Во документот се посочува дека Србија е на „добро ниво“ на подготовка во однос на макроекономската стабилност и фискалната дисциплина, но дека има „ограничен“ или „никаков“ севкупен напредок во исполнувањето на критериумите за членство во ЕУ во клучните области како што се владеењето на правото, слободата на медиумите, реформите во јавната администрација и усогласувањето со политиките на Унијата, особено во делот на надворешната политика.
– Блиските односи на Србија со Русија предизвикуваат загриженост за нејзината стратешка ориентација, оценуваат европратениците.
Во текстот се посочува и дека темпото на пристапните преговори на Србија зависи и од нејзината посветеност на дијалогот Белград-Приштина, кој „треба да се води со добра волја за да се обезбеди правно обврзувачки договор заснован на взаемно признавање“.
Европратениците, исто така, изразуваат загриженост за „смирувачкиот пристап“ на Комисијата кон Србија во позадина на едногодишното назадување на земјата во сферата на владеењето на правото, демократијата и основните права, како и нејзиното дестабилизирачко влијание врз целиот регион.
Нагласувајќи дека нивото на корупција во Србија е значајна пречка за нејзиниот процес за пристапување кон ЕУ, европратениците бараат целосна и транспарентна правна постапка и официјална истрага за уривањето на покривот на железничката станица во Нови Сад на 1 ноември 2024 година и непристрасна истрага за наводната употреба на „незаконска технологија за контрола на толпата против демонстрантите“ во на протестот во Белград.
Европратениците посочуваат и дека се длабоко загрижени за системските прашања нагласени во студентските и другите протести во Србија, како што се прашањата поврзани со граѓанските слободи, поделбата на власта, корупцијата, заштитата на животната средина и институционалната и финансиската транспарентност, изразувајќи жалење што Владата ја пропуштила можноста да ги исполни барањата на студентите, кои во голема мерка тие се во согласност со реформите што се очекува да ги спроведе земјата во текот на пристапниот процес кон ЕУ.
Според известувачот на ЕП за Србија, хрватскиот европратеник Тонино Пицула, долгата политичка криза, интензивирана поради недостигот на напредок во основните критериуми, како што се корупцијата, владеењето на правото, слободата на медиумите и изборните реформи, има директно влијание врз напредокот на државата кон членство во ЕУ.
– Тој процес е заснован на заслуги, а напредокот на Србија може да има позитивно влијание врз целиот регион, додаде Пицула, пренесе МИА.
